“Liverpul”un keçmiş baş məşqçisi, alman mütəxəssis Yurgen Klopp Mersisayd klubunun xeyriyyə fondunun fəxri səfiri təyin edilib.
Arena.az bu barədə “Liverpul”un rəsmi saytına istinadən məlumat verir.
Xatırladaq ki, 2024-cü il yanvar ayının sonunda Klopp 2023/2024-cü illər mövsümünün bitməsilə “qırmızılar”ın sükanı arxasından arılacağını açıqlamışdı.
Mövsümün bitməsilə “Liverpul”dan ayrılmış alman mütəxəsssisin yerinə “qırmızılar” niderlandlı mütəxəssis Arne Slotu dəvət ediblər. “Liverpul” Slotla müddəti 2027-ci ilin iyun ayının sonuna qədər qüvvədə olacaq müqavilə imzalayıb.
Yurgen Klopp “Liverpul”un sükanı arxasına 2015-ci il oktyabrın 8-dən gəlib. Bu müddət ərzində 56 yaşlı alman mütəxəssis “qırmızılar”la 8 kubok qazanıb. Klopun rəhbərliyi altında “Liverpul” İngiltərə Premyer Liqasını, İngiltərə Kubokunu, İngiltərə Liqa Kubokunu, UEFA Çempionlar Liqasını, UEFA Super Kubokunu və FIFA Klub Dünya Kubokunu qazanıb. Ən əsası isə alman mütəxəssis “Liverpul”u İngiltərə futbolunda itirdiyi mövqeyinə qaytarmağı bacarıb.
Yurgen Klopp “Liverpul”u 489 oyuna çıxarıb. “Qırmızılar” bu oyunlarda 304 qələbə qazanıblar, 100 heç-heçə ediblər, 85 oyunda isə məğlubiyyətə üzülüblər. Topların fərqi isə 1088:550 nisbətindədir.
