Almaniyanın “Volfsburq” klubu heyətini daha üç futbolçu – Konstantinos Kolierakis, Denis Vavro və Salih Özcanla gücləndirib.
Arena.az bu barədə Bundesliqa klubunun rəsmi saytına istinadən məlumat verir.
Sözügedən klub Konstantinos Kulierakisi PAOK-dan 11,75 milyon avroya transfer edib. Mərkəz müdafiəçisi olan 20 yaşlı yunan futbolçu ilə uzunmüddətli müqavilə imzalandığı diqqətə çatdırılıb.
Konstantinos Kulierakis PAOK-un yetirməsidir və bütün karyerası bu kluba məxsusdur. O, Saloniki təmsilçisinin əsas komandasında 73 oyuna çıxıb, 9 qol və 4 məhsuldar ötürmə müəllifi olub.
2022-ci ilin noyabr ayında Yunanıstan millisində də debüt etmiş Koulierakis, artıq yığmanın heyətində 6 oyun keçirib.
Denis Vavro Danimarkanın “Kopenhagen” klubundan, Salih Özcan isə Dortmund “Borussiya”sından bu mövsümün sonuna kimi icarəyə götürülüb. Onların icarə müqaviləsində satınalmaya dair şərt nəzərdə tutulmayıb.
Mərkəz müdafiəçisi olan Vavro “Jilina”, “Latsio”, “Hueska” kimi klublarda da oynayıb. 28 yaşlı futbolçu “Kopenhagen”də 200 oyuna çıxıb, 10 qola imza atıb, 8 assist müəllifi olub. Slovakiya yığmasında 24 oyun keçirmiş futbolçu 2 qol və 1 assistlə yadda qalıb.
Salih Özcan isə dayaq yarımmüdafiəçisidir. “Köln”ün yetirməsi olan futbolçu “Holştayn Kil” klubunda da forma geyinib. 2022-ci ildən “Borussiya”da olan 26 yaşlı Dortmund klubunun heyətində 70 oyuna çıxıb, 2 məhsuldar ötürmə ilə yadda qalıb. Almaniyanın aşağı yaş qrupları üzrə müxtəlif yığmalarında oynamış Salib, 2022-ci ilin martında Türkiyə millisində debüt edib. O, qardaş ölkənin yığma komandasında 22 oyun keçirib, 1 məhsuldar ötürmə verib.
“Volfsburq” öz oyunçularından Nikolas Kossanı da “Nant”a icarəyə verib. Fransalı 25 yaşlı sol cinah müdafiəçisi bu mövsümün sonunadək icarədə olacaq. “Volfsburq”da cəmi 13 oyun keçirmiş futbolçu daha öncə də “Nant”da çıxış edib, bu komandada 14 oyun keçirib. O, uzun illər yetirməsi olduğu “Monpelye”nin uğurları üçün çalışıb. Kozza Fransanın aşağı yaş qrupları üzrə müxtəlif yığmalarında da oynayıb.
