Bu yay Almaniyanın “Bayern” klubundan ayrılan fransalı futbolçu Korentin Tolisso özünə yeni iş yeri tapıb. Arena.az xəbər verir ki, 27 yaşlı yarımmüdafiəçi Fransanın “Olimpik” (Lion) klubu ilə razılığa gəlib.
O, köhnə-yeni klubu ilə 5 illik müqavilə imzalayıb. Bu barədə Liqa 1 təmsilçisinin rəsmi saytı məlumat yayıb.
Xatırladaq ki, Korentin Tolisso məhz Lion “Olimpik”inin yetirməsidir. O, 2017-ci ilin yayında məhz bu klubdan “Bayern”ə keçmişdi. Yarımmüdafiəçi Münhen təmsilçisinin heyətində 5 dəfə Bundesliqa çempionu, 1 dəfə UEFA Çempionlar Liqasının, 2 dəfə isə ölkə kubokunun qalibi olub. Fransız oyunçu “Bayern”də 118 oyuna 21 qol və 15 məhsuldar ötürmə ilə yadda qalıb.
Tolisso həmçinin Fransa millisinin heyətində 2018-ci ildə dünya çempionluğunu qazanıb. O, ölkəsinin yığma komandasında 28 oyuna 2 qol vurub.
