Portuqaliya yığmasının hücumçusu Kristiano Ronaldo Səudiyyə Ərəbistanının “Əl-Nəsr” klubunun heyətində növbəti matçına çıxıb.
Arena.az xəbər verir ki, o, Səudiyyə Ərəbistanı çempionatının 3-cü turu çərçivəsində baş tutan “Əl-Əhli” ilə oyunun iştirakçısı olub.
“Əl-Nəsr” doğma meydanda baş tutan bu oyunda 1:1 hesablı heç-heçə ilə kifayətlənib. 57-ci dəqiqədə ivuarlı yarımmüdafiəçi Frank Kessye qonaqları hesabda önə çıxarıb. “Əl-Nəsr” 90+9-cu dəqiqədə Bassam Əl-Xuraycinin qolu ilə məğlubiyyətdən qurtulub.
3 turdan sonra 5 xal toplamış “Əl-Nəsr” çempionatın yarış cədvəlinin 6-cı pilləsində qərarlaşıb. “Əl-Əhli” isə 4 xalla 9-cu pillədə yer alıb.
Oyundan sonra Ronaldo adəti üzrə oyun haqda özünün sosial şəbəkə hesabları üzərindən fikrini paylaşıb: “Son ana qədər. İnanmağa davam edin!”.
Maraqlıdır ki, “Əl-Əhli” ilə oyun Ronaldonun cari mövsümdə rəqib qapısına yol tapa bilmədiyi ilk oyun olub.
Oyundan əvvəl “Əl-Nəsr” klubu adından Ronaldoya üzərində “GOAT” kəlməsi (ingiliscə ixtisardan: Greatest of all time – bütün zamanların ən böyüyü) və “900” ədədi həkk edilmiş klubun futbol köynəyi xatirə hədiyyəsi olaraq təqdim edilib. Köynək Ronaldonun futbolçu karyerası ərzində 900 qol həddinə çatması münasibətilə təqdim edilib.
Xatırladaq ki, daha əvvəl Ronaldo UEFA Millətlər Liqası çərçivəsində Xorvatiya yığmasının qapısına yol tapraq, futbolçu karyerası ərzində rəsmən 900 qol həddinə çatmış ilk futbolçu ünvanına sahib olmuşdu.
Kristiano Ronaldo 2023-cü ilin yanvarından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 5 oyuna 4 qol və 2 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 69 oyun, 62 qol və 17 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib.
Kristiano Portuqaliya yığmasının heyətində 214 oyuna 132 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
“Transfermarkt” internet-portalı 39 yaşlı hücumçunun transfer dəyərini 15 milyon avro məbləğində qiymətləndirir.
