PSJ-nin ulduzu Lionel Messi Parisdə özünün keçmiş komanda yoldaşları – Jordi Alba, Serxi Roberto və Serxio Busketslə görüşüb.
Arena.az “Mundo Deportivo”ya istinadən xəbər verir ki, görüş ötən həftə şam yeməyi süfrəsində baş tutub.
“Barselona”lı futbolçuların Parisə səfəri baş məşqçi Xavinin komandaya çempionluğu qazanması münasibətilə verdiyi qısamüddətli məzuniyyət günlərinə təsadüf edib. Söhbət əsnasında ispan futbolçular Messidən onun gələcəyi haqda fikir öyrəniblər. Lionel isə cavabında etiraf edib ki, hələ də “Barselona”ya keçid haqda kimsədən təklif almayıb.
Xatırladaq ki, bir müddət əvvəl Messi PSJ ilə müqavilə müddətinin bitməsi səbəbilə Səudiyyə Ərəbistanının “Əl-Hilal” klubunun hədəfinə düşmüşdü. Bu arada PSJ ulduz futbolçusunu heyətində saxlamaq üçün dəridən-qabıqdan çıxır. Parislilər Messiyə illik məbləği 100 milyon avro olan yeni müqavilə təklif ediblər. Müxtəlif qeyri-səhih mənbələrdən gələn məlumata görə, “Barselona” da keçmiş futbolçusuna maraq göstərir.
Qeyd edək ki, Jordi Alba və Serxio Buskets bu mövsüm bitən kimi “Barselona”dan ayrılacaqlar. Kataloniya təmsilçisi onların ayrılığını rəsmi saytı vasitəsilə elan edib. Bu isə o deməkdir ki, Messi keçmiş klubuna qayıtsa, bir daha onlarla çiyin-çiyinə oynaya bilməyəcək.
35 yaşlı Messinin PSJ ilə müqaviləsinin müddəti cari mövsümün sonunda başa çatır. Bu mövsümdə argentinalı ulduz Paris təmsilçisinin heyətində 39 oyuna çıxaraq 20 qol vurub və bir o qədər də məhsuldar ötürmə edib. Messi PSJ ilə Fransa çempionluğunu qazanıb.
İspaniyanın “Barselona” klubunun yetirməsi olan Lionel Messi 2004-2011-ci illər aralığında məhz Kataloniya təmsilçisinin uğurları üçün çalışıb. O, bu komandada 778 matça çıxıb, 672 qola imza atıb və 303 məhsuldar ötürmə müəllifi olub. 2021-ci ilin yayından Fransa nəhəngi PSJ-də forma geyinən təcrübəli oyunçu Paris təmsilçisində də 73 matçda 31 qol və 35 məhsuldar ötürmə müəllifi olub. O, Argentina milli komandasında da 174 oyuna 102 qol vurub.
