Lionel Messi: “Hər gündən həzz almağa çalışıram”

“İnter Mayami”nin argentinalı ulduzu Lionel Messi futbolçu karyerasını bitirdikdən sonra nə edəcəyi barədə hələ düşünmədiyini etiraf edib.

Arena.az məlumat verir ki, Messi bu barədə “Big Time” podkastında söhbət açıb:

“Karyeramı bitirdikdən sonra nə edəcəyimi hələ düşünməmişəm. Gələcəyi düşünmədən hər gündən, hər andan həzz almağa çalışıram. Hələ heç nə aydın deyil, ümidvaram ki, bir müddət daha oynayacağam və bu, mənim xoşuma gəlir. Zamanı gələndə mütləq zövq alacağım yeni rol tapacağam.

Bəxtim gətirdi ki, bir oyunçu kimi bütün arzularıma çata bildim, daha çoxunu tələb edə bilmərəm. Çalışıram ki, indiyə qədər tanrının mənə bəxş etdiyi hər şeydən həzz alıb, O, mənə lənət olası qədər çoxunu verib”, deyə “Leo” bildirib.

Lionel Messi 2023-cü ilin yayında PSJ-dən azad agent qismində “İnter Mayami”yə keçib. Messinin amerikan klubu ilə müddəti 2025-ci ilin dekabr ayının sonuna qədər qüvvədə olacaq müqaviləsi var.

Argentinalı ulduz cari mövsümdə “İnter Mayami”nin heyətində bütün yarışlarda 5 oyuna çıxıb, 5 qol vurub və 2 məhsuldar ötürmə verib.

“Leo” hazırda kapitanı olduğu Argentina yığmasında 2005-ci il avqustun 17-də debüt edib. 18 il ərzində ulduz hücumçu yığmada 180 oyun keçirib, 106 qol vurub və 56 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.

Argentinalı superulduz yığma ilə Yay Olimpiya Oyunlarının (2008), Amerika Kubokunun (2021), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının gümüş (2014), Amerika Kubokunun gümüş (2007, 2015, 2016) mükafatçısı olub.
Ötən il oktyabrın 30-da Messi karyerasında 8-ci “Qızıl top”a layiq görülüb. “Leo” daha öncə 2009, 2010, 2011, 2012, 2015, 2019 və 2021-ci illərdə “Qızıl top”un sahibi olmuşdu və bu mütləq rekorddur.

“Transfermarkt” internet-portalı 36 yaşlı Messinin transfer dəyərini 30 milyon avro məbləğində qiymətləndirir.

Vurğulayaq ki, Messi hazırda yüngül zədədən əziyyət çəkir və bərpa ilə məşğuldur.