“İnter Mayami”nin argentinalı ulduz hücumçusu Lionel Messi “vağlar”ın sentyabrın 11-də keçirilmiş məşqini gözlənilmədən buraxıb.
Arena.az bu barədə “Miami Herald” dərgisinə istinadən məlumat verir.
Ancaq mənbənin məlumatına görə, Messinin cangüdəni klubun bazasında gözə dəyib. Bu səbəbdən təxmin edilir ki, argentinalı ulduz fərdi proqram əsasında məşq edə bilərdi.
Bir qədər sonra məlum olub ki, “Leo” “vağlar”ın ümumi dəstə halında məşqini qrip əlamətləri hiss etdiyinə görə tərk edib. Bu barədə məlumatı isə jurnalist Qaston Edul təqdim edib.
Messinin “İnter Mayami”nin növbəti iki oyunundan birində yenidən meydana qayıda biləcəyi də bildirilir. Sentyabrın 19-da “İnter Mayami” “Atlanta Yunayted”lə oyunayacaq.
Növbəti oyunda, sentyabrın 15-nə keçən gecə isə “vağlar” “Filadelfiya Yunion”la qarşılaşacaqlar.
Xatırladaq ki, Messi iyulun 15-də Argentina yığmasının 2024-cü ildə ABŞ-da keçirilmiş Amerika Kubokunun Kolumbiya yığması ilə final oyununda (1:0) ayağından zədə almışdı. Hazırda ulduz hücumçu bərpa mərhələsindən keçir.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Buna qədər Messi yalnız “Barselona” və PSJ-də çıxış edib.
Argentinalı ulduz cari mövsümdə “İnter Mayami”nin heyətində bütün yarışlarda 15 oyuna çıxıb, 14 qol vurub və 11 məhsuldar ötürmə verib. Təcrübəli futbolçunun “İnter Mayami” karyerası ümumilikdə 29 oyun, 25 qol və 16 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 187 oyun keçirib, 109 qol vurub və 58 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
