Futbol üzrə Argentina millisinin hücumçusu Lionel Messi MLS təmsilçisi “İnter Mayami”nin heyətində növbəti oyununa çıxıb.
Arena.az məlumat verir ki, MLS müntəzəm mövsümünün Şərq konfransında növbəti turun oyunu çərçivəsində “İnter Mayami” “Filadelfiya Yunion”u qəbil edib.
Oyun “vağlar”ın qonaqlar üzərində 3:1 hesablı əzmkar qələbəsi ilə başa çatıb. Bu görüş “İnter Mayami”nin argentinalı ulduz hücumçusu və kapitanı Messi üçün əlamətdar olub. Belə ki, iki aylıq zədədən sonra ilk dəfə meydana çıxmış argentinalı ulduz dörd dəqiqə ərzində dubla imza ataraq və bir məhsuldar ötürmə verərək, komandasının əzmkar qələbəsinə töhfəsini verib. Oyunda son nöqtəni isə “vağlar”ın uruqvaylı hücumçusu Luis Suares qoyub.
Messi bu qollar sayəsində, peşəkar futbolçu karyerası ərzində vurduğu qolların sayını 840-a çatdırıb.
28 turdan sonra “İnter Mayami” 62 xalla MLS-in Şərq konfransının yarış cədvəlinə başçılıq edir.
“Belə axşamlar üçün çox darıxmışdım”
Oyundan sonra Messi özünün sosial şəbəkə hesablarından biri üzərindən yaşıl meydana qayıdışını şərh edib:
“Belə axşamlar üçün çox darıxmışdım. Məqsədlərimizə çatmaq üçün birləşməyə davam edirik”, – “Leo” paylaşıb.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Buna qədər Messi yalnız “Barselona” və PSJ-də çıxış edib.
Argentinalı ulduz cari mövsümdə “İnter Mayami”nin heyətində bütün yarışlarda 16 oyuna çıxıb, 16 qol vurub və 12 məhsuldar ötürmə verib. Təcrübəli ulduzun “İnter Mayami” karyerası ümumilikdə 30 oyun, 27 qol və 17 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 187 oyun keçirib, 109 qol vurub və 58 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
