Futbol üzrə Braziliya milli komandasının və İngiltərənin “Liverpul” klubunun təcrübəli qapıçısı Alisson Bekker zədələnib.
Arena.az xəbər verir ki, 31 yaşlı qolkiper komandanın son məşqlərindən biri zamanı sıradan çıxıb.
Bildirilir ki, futbolçunun zədəsi ciddidir. Belə ki, diz nahiyəsindən aldığı zədə səbəbindən Alisson Braziliya millisinin İngiltərə (23 mart) və İspaniyaya (26 mart) qarşı yoldaşlıq oyunlarında iştirak edə bilməyəcək.
Ehtimal olunur ki, Alisson millinin oyunlarından əlavə, “Liverpul”un İngiltərə Premyer Liqasında “Luton Taun”, “Nottingem Forest”, “Mançester Siti” və “Everton”a qarşı görüşlərini, həmçinin “Çelsi” ilə İngiltərə Liqa Kuboku matçını buraxmaq məcburiyyətində qalacaq.
Alisson “İnternasyonal”ın yetirməsidir. Braziliyalı qapıçı “Liverpul”a 2018-ci ilin iyulunda 62,5 milyon avro müqabilində “Roma”dan keçib. Alissonun “qırmızılar”la müqaviləsi 2027-ci ilin iyun ayının sonuna qədər qüvvədədir.
Cari mövsümdə Alisson “Liverpul”un heyətində 24 oyuna çıxıb, 21 qol buraxıb, 9 matçda qapısını toxunulmaz saxlayıb. Alissonun Mersisayd təmsilçisinin heyətində ümumi statistikası isə belədir: 255 oyun, 225 buraxılmış qol, 112 “quru” oyun.
Alisson Bekker klub səviyyəsində qazandığı bütün qənimətlərini “Liverpul”la əldə edib: İngiltərə Premyer Liqası (2019/2020), İngiltərə Kuboku (2022), İngiltərə Liqa Kuboku (2022), Çempionlar Liqası (2018/2019), UEFA Super Kuboku (2019/2020), FIFA Klub Dünya Kuboku (2020).
Alisson 2015-ci ilin oktyabrında debüt etdiyi Braziliya millisinin heyətində 63 oyuna çıxıb. Təcrübəli qapıçı bu görüşlərdə 26 qol buraxıb, 41 oyunda qapısının toxunulmazlığını təmin edib. O, “selesao” ilə 2019 Amerika Kubokunun qalibi olub.
“Transfermarkt” internet-portalı 31 yaşlı Alisson Bekkeri 32 milyon avro məbləğində qiymətləndirir.
Sonda onu da xatırladaq ki, “Liverpul”da müdafiəçilər Trent Aleksander-Arnold, Joel Matip, yarımmüdafiəçilər Kurtis Cons, Dominik Soboslai, Tyaqo, hücumçular Dioqo Jota və Darvin Nunyes də zədədən əziyyət çəkirlər.
“Liverpul” Premyer Liqanın 2023/2024 mövsümündə 25 turdan sonra 57 xalla vahid liderdir. Bu komandanı 56 xala malik “Mançester Siti” və 55 xalla “Arsenal” izləyirlər.
