İspaniya yığmasının baş məşqçisi Luis de la Fuente cinah hücumçusu Ferran Torresin UEFA Millətlər Liqasındakı çıxışını qiymətləndirib.
Arena.az xatırladır ki, UEFA Millətlər Liqasının 2024/2025-ci illər mövsümünün 2-ci turunun İsveçrə yığması ilə oyununda (4:1) Ferran Torres Lamin Yamalın əvəzinə fasilədə əvəzedici kimi meydana çıxıb, qol vurub və məhsuldar ötürmə verib.
“Mən Ferranı hələ 16 yaşından tanıyıram və onun komandamıza nələr gətirə biləcəyini çox yaxşı başa düşürəm. Bu həftə o, komandanın kapitanlarından biri seçilib. Nisbətən gənc yaşına rəğmən, Ferran indiki oyunçuları arasında milli komandanın heyətində ən çox oyun keçirməyi bacarıb. O, çox dəyərli futbolçudur, amma bəzən təəssüf ki, onun nailiyyətləri bəzi digər oyunçularda olduğu kimi, lazımi qiyməti almır”, deyə Luis de la Fuente vurğulayıb.
Ferran Torres “Valensiya”nın yetirməsidir. 2020-ci ilin avqsutunda “yarasalar” ispan hücumçunu “Mançester Siti”yə satıblar. 2022-ci ilin yanvarında isə “Barselona” Torresi 55 milyon avro müqabilində “şəhərlilər”in düşərgəsindən öz heyətinə qatıb. Kataloniya klubunun ispan futbolçu ilə müqaviləsi 2027-ci ilin iyun ayının sonuna qədər qüvvədədir.
Cari mövsümündə Torres “blauqrana”nın heyətində 4 oyuna çıxıb, 1 qol, 1 məhsuldar ötürmə ilə fərqlənib. Torresin “Barselona”nın heyətində çıxışının ümumi mənzərədi isə belədir: 117 oyun, 26 qol, 14 məhsuldar ötürmə.
Ferran Torres 2020-ci ilin sentyabrında debüt etdiyi İspaniya yığmasının heyətində 48 oyun keçirib, 21 qol vurub, 5 məhsuldar ötürmə verib.
Ferran Torresin qənimətlər muzeyində “Mançester Siti” ilə İngiltərə Premyer Liqası (2020/2021, 2022/2023) və İngiltərə Kuboku (2021), “Valensiya” ilə İspaniya Kral Kuboku (2018/2019), həmçinin “Barselona” ilə İspaniya La Liqası (2022/2023) və İspaniya Super Kuboku (2022/2023) var.
Torres bu il İspaniya yığması ilə Avropa çempionu (AÇ-2024) olub. O, yeniyetmə və gənclər səviyyəsində – U-17 və U-19 yığmaları ilə də müvafiq olaraq 2017-ci və 2019-cu illərdə Avropa çempionatlarının qalibi olub.
“Transfermarkt” internet-portalı 24 yaşlı ispan vingerin transfer dəyərini 30 milyon avro məbləğində qiymətləndirir.
