İspaniya nəhəngi “Real”ın xorvat yarımmüdafiəçisi Luka Modriç Madrid təmsilçisi ilə yeni müqavilə imzalayıb.
Arena.az Xorvat İnformasisa Agentliyinə (HINA) istinadən xəbər verir ki, 37 yaşlı futbolçu daha bir mövsüm “Kral klubu”nda qalacaq.
Yenilənmiş müqavilə 2024-cü ilin iyul ayının 1-nə qədər qüvvədə olacaq.
Modriçin “Real”la cari müqaviləsi bu ilin iyun ayının sonunda başa çatacaq. Daha əvvəl Səudiyyə Ərəbistanı klubunun təcrübəli oyunçuya 3 illik müqavilə təklifi ilə müraciət etdiyi haqda məlumat yayılmışdı.
Geridə qalmış mövsümdə Luka Modriç “Real”ın heyətində 52 oyuna çıxıb, 6 qol vurub və 6 məhsuldar ötürmə ilə fərqlənib. “Real” 2022/2023 mövsümündə İspaniya La Liqasını ikinci sırada tamamlayaraq “gümüş”lə kifayətlənib və İspaniya Kubokunu qazanıb.
“Transfermarkt” internet-portalı Modriçi 10 milyon avro məbləğində qiymətləndirir.
