Avropa Liqasının 1/8 finalında Praqa “Sparta”sına qarşı ev oyunu “Liverpul”un misirli hücumçusu Məhəmməd Salah üçün əlamətdar olub.
Arena.az məlumat verir ki, “qırmızılar”ın 6:1 hesabı ilə qələbə qazandığı oyunda Salah komandasının qollarından birini vurub.
Bu, Salahın cari mövsümdə “Liverpul” üçün vurduğu 20-ci qol olub. Beləliklə misirli ulduz klub tarixində 7 ardıcıl mövsümdə bütün yarışlarda 20 və daha artıq qol vurmuş ilk futbolçu kimi, adını İngiltərə nəhənginin tarixinə yazıb.
Vurğulayaq ki, bu oyunda Salah həmçinin 3 məhsuldar ötürmə ilə də fərqlənib.
Salahın 2017-ci ilin yayında “Liverpul”a qoşulmasından sonra mövsümlər üzrə bütün yarışlarda vurduğu qolların sayını təqdim edirik:
2017/2018 mövsümü: 44 qol;
2018/2019 mövsümü: 27 qol;
2019/2020 mövsümü: 23 qol;
2020/2021 mövsümü: 31 qol;
2021/2022 mövsümü: 31 qol;
2022/2023 mövsümü: 30 qol;
2023/2024 mövsümü: 20 qol.
İlk oyunda səfərdə 5:1 hesabı ilə qələbə qazanmış “qırmızılar”, doğma “Enfild”də rəqibini 6:1 hesabı ilə darmadağın ediblər. Beləliklə iki oyunun nəticəsinə görə rəqibi 11:2 hesabı ilə məğlub etmiş “Liverpul” Avroliqanın 1/4 finalına vəsiqə qazanıb.
“Liverpul”un baş məşqçisi Yurgen Klopp oyundan sonra Salah haqda danışıb və onu müdafiə olunmamağa icazə verdiyi ilk futbolçusu olaraq səciyyələndirib:
“Bu oyunda ilk dəfə futbolçunun müdafiə olunmamasına icazə verdim. Salahın mümkün qədər çox qol vurmasını istəyirdim. Məhəmməd çox təcrübəli oyunçudur”.
Xatırladaq ki, Məhəmməd Salah 2017-ci ilin iyulundan “Liverpul”da çıxış edir. İngiltərə nəhəngi həmin vaxt Salahın “Roma”dan transferi üçün 42 milyon avro məbləğində xərc çəkmişdi. Misirli ulduzun “qırımızlar”la müqaviləsi 2025-ci ilin iyun ayının sonuna qədər qüvvədədir.
Cari mövsümdə Salah “qırmızılar”ın heyətində bütün yarışlarda 31 oyuna 20 qol vurub, 13 məhsuldar ötürmə verib. Salahın “Liverpul”un heyətində ümumi statistikası isə belədir: 336 oyun, 206 qol, 92 məhsuldar ötürmə.
Misirli ulduz hücumçu “Liverpul”la bütün mümkün ali klub turnirlərinin qalibi olub.
Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 96 oyun keçirib, 54 qol vurub, 32 məhsuldar ötürmə verib.
