Premyer Liqanın 32-ci turunda “Mançester Yunayted”ə qarşı oyun “Liverpul”un misirli ulduz hücumçusu Məhəmməd Salah üçün əlamətdar olub.
Arena.az məlumat verir ki, “Old Trafford”da keçirilimiş səfər oyununda Salah penaltidən qol vurmaqla, “qırmızılar”ı məğlubiyyətdən qurtarıb – 2:2.
Bu qol misirlu ulduzun İngiltərə Premyer Liqası çərçivəsində “Old Trafford”da “Mançester Yunayted”in qapısına vurduğu 6-cı qol olub. Beləliklə Salah müvafiq nəticəyə imza atmış ilk futbolçu olub.
İndiyə qədər Salah müvafiq nəticəni “Liverpul”un sabiq kapitanı, ingilis mərkəz yarımmüdafiəçisi Stiven Cerrardla bölüşürdü. Cerrard Premyer Liqa çərçivəsində “Old Trafford”da “Mançester Yunayted”in qapısına 5 dəfə yol tapıb.
Məhəmməd Salah 2017-ci ilin iyulundan “Liverpul”da çıxış edir. İngiltərə nəhəngi həmin vaxt Salahın “Roma”dan transferi üçün 42 milyon avro məbləğində xərc çəkmişdi. Misirli ulduzun “qırımızlar”la müqaviləsi 2025-ci ilin iyun ayının sonuna qədər qüvvədədir.
Cari mövsümdə Salah “qırmızılar”ın heyətində bütün yarışlarda 35 oyuna 23 qol vurub, 13 məhsuldar ötürmə verib. Salahın “Liverpul”un heyətində ümumi statistikası isə belədir: 340 oyun, 209 qol, 89 məhsuldar ötürmə.
Misirli ulduz hücumçu “Liverpul”la bütün mümkün ali klub turnirlərinin qalibi olub. Salah “Liverpul” və “Roma”dan başqa, “Bazel”, “Fiorentina”, “Çelsi”, “Əl-Mukavilun” kimi klubların da formasını geyinib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 96 oyun keçirib, 54 qol vurub, 32 məhsuldar ötürmə verib.
“Transfermarkt” internet-portalı 31 yaşlı misirli vingerin transfer dəyərini 65 milyon avro məbləğində qiymətləndirir.
