“Mançester Siti” “şəhərlilər”in ispan dayaq yarımmüdafiəçisi Rodrinin sağ dizindən aldığı zədənin təfərrüatını açıqlayıb.
Arena.az “Mançester Siti”nin mətbuat xidmətinə istinadən müvafiq bəyanatı təqdim edir:
“Bu həftə yarımmüdafiəçi Mançesterdə ilkin müayinədən keçdikdən sonra mütəxəssis məsləhəti üçün İspaniyaya yollanıb. Zədəsinin şiddət dərəcəsini və onun meydana qayıtması ilə bağlı təxmini müəyyən etmək üçün Rodrinin vəziyyətini qiymətləndirməyə davam edəcəyik”, – “şəhərlilər”in bəyanatında deyilir.
Xatırladaq ki, Rodri sentyabrın 22-də İngiltərə Premyer Liqasının 5-ci turunun “Arsenal”la oyununda (2:2) zədələnib. Oyundan sonra 28 yaşlı futbolçunun dizində çarpaz bağın yırtıldığı və bunun nəticəsində Rodrinin cari mövsümün qalan hissəsini buraxa biləcəyi barədə məlumat yayılıb.
Rodriqo Ernandes Madrid “Atletiko”sunun yetirməsidir, ispan “dayaqçı” 2007-2013-cü illərdə “döşəkçilər”in klub sistemində olub. Daha sonra Rodri “Vilyarreal”a keçib. Ancaq 2018-ci ildə yarımmüdafiəçi 2019-cu ilə qədər oynadığı “Atletiko”ya qayıdıb.
Rodri hazırda çıxış etdiyi “Mançester Siti”yə 2019-cu ilin iyulunda 70 milyon avro məbləğ müqabilində elə, “Atletiko”dan keçib. Rodrinin “Mançester Siti” ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə Rodri “şəhərlilər” üçün 3 oyun keçirib, məhsudalr fəaliyyəti ilə diqqət çəkməyib. Təcrübəli yarımmüdafiəçi “şəhərlilər”in heyətində bütövlükdə 260 oyuna çıxıb, 26 qol və 30 məhsuldar ötürmə müəllifi olub.
Rodri “Mançester Siti” ilə İngiltərə Premyer Liqasının (2020/2021, 2021/2022, 2022/2023, 2023/2024), İngiltərə Kubokunun (2023), İngiltərə Liqa Kubokunun (2020, 2021), İngiltərə Super Kubokunun (2020), Çempionlar Liqasının (2022/2023), UEFA Super Kubokunun (2023/2024), FIFA Klub Dünya Kubokunun (2024) qalibi olub. Rodri həmçinin Çempionlar Liqasında 2022/2023-cü illər mövsümünün oyunçusu seçilib.
Rodriqo Ernandes 2018-ci ilin martında debüt etdiyi İspaniya yığmasının heyətində 57 oyun keçirib, 4 qol vurub, 2 məhsuldar ötürmə verib. Rodri İspaniya yığması ilə 2023-cü il UEFA Millətlər Liqasının və 2024-cü il Avropa çempionatının qalibi olub.
“Transfermarkt” internet-portalı 28 yaşlı yarımmüdafiəçinin transfer dəyərini 130 milyon avro məbləğində qiymətləndirir. Bu isə Rodrinin futbol tarixində ən bahalı ispan futbolçu olması deməkdir.
