Azərbaycanın qadın güləşçisi Mariya Stadnik Fransanın paytaxtı Parisdə keçirilən Yay Olimpiya Oyunlarında mübarizəyə başlayıb.
Arena.az xəbər verir ki, 50 kq çəki dərəcəsində mübarizə aparan idmançımız 1/8 final mərhələsində almaniyalı Anastasiya Blayvasla üz-üzə gəlib.
Rəqibinə 6:2 hesabı ilə qalib gələn Mariya Stadnik 1/4 finala vəsiqə qazanıb. O, növbəti raundda Monqolustan təmsilçisi Otqonjarqal Dolqorjavla görüşəcək.
Bu gün həm də Azərbaycanın yunan-Roma güləşçisi Sənan Süleymanov Yay Olimpiya Oyunlarında mübarizəyə başlayıb. 77 kq çəki dərəcəsində çıxış edən idmançımız 1/8 final mərhələsində Bolqarıstanı təmsil edən Ayk Mnatsakanyanla qarşılaşıb. Görüş idmançımızın 2:0 hesablı qələbəsi ilə yekunlaşıb. Sənan Süleymanov 1/4 finalda Macarıstan təmsilçisi Zoltan Levayla üz-üzə gələcək.
Xatırladaq ki, Azərbaycan güləşçiləri Olimpiadada mübarizəyə ötən gündən start veriblər. İlk gündə mübarizəyə qoşulmuş Yunan-Roma güləşi üzrə yığmamızın üzvü Murad Məmmədov startda uduzub. Sabah Şəriəti isə yarımfinalda uduzduğu üçün bu gün bürünc medal uğrunda mübarizə aparacaq.
Qeyd edək ki, Paris-2024 avqustun 11-də başa çatacaq. İndiyədək cüdoçular Hidayət Heydərov (73 kq) və Zelim Kotsoyev (100 kq) olimpiya çempionu olublar. Boksçu Alfonso Dominqes (92 kq) finala yüksəlməklə ən azı gümüş medalı təmin edib.
