“Barselona”nın yeniyetmə ispan dayaq yarmmüdafiəçisi Mark Bernal Kataloniya təmsilçisi ilə yeni müqaviləyə imza atıb.
Arena.az bu barədə klubun rəsmi saytına istinadən xəbər verir.
17 yaşlı yarımmüdafiəçi ilə yeni müqavilənin müddəti 2026-cı ilin iyununa kimi uzadılıb. Bernalın 19 yaşı tamam olduqda, onunla sözləşmənin müddəti avtomatik olaraq daha 3 il uzadılacaq. “Barselona” yeniyetmə futbolçusuna 500 milyon avro təzminat qiyməti qoyulub.
Xatırladaq ki, Bernal bir müddət öncə aldığı ciddi zədə səbəbi ilə cərrahi əməliyyat edilib. Yarımmüdafiəçi avqustun 27-də İspaniya La Liqasının 3-cü turunun “Rayo Valyekano” ilə oyununda (2:1) ciddi zədə almışdı. Bernala, sol dizin ön çarpaz bağının və xarici meniskinin zədələnməsi diaqnozu qoyulmuşdu.
Hazırda futbolçu müddəti 12 aya qədər təxmin edilən bərpa mərhələsinə hazırlaşır. Klubun onunla yeni müqavilə bağlamasının da zədəli olan oyunçuya dəstək xarakteri daşıdığı ehtimal olunur.
Dayaq yarımmüdafiəçisi olan Mark Bernal “Barselona”nın yetirməsidir. Yeniyetmə futbolçu “blauqrana”nın əsas komandasına cari ilin iyulunda keçirilmişdi.
Yarımmüdafiəçi əsas komandada İspaniya çempionatının cari mövsümünün ilk turunda “Valensiya” ilə matçda debüt edib, daha sonra “Atletik” və “Rayo Valyekano” ilə görüşlərdə iştirak edib. Cari mövsümdə Bernal “Barselona” üçün cəmi 3 oyun keçirib, məhsuldar fəaliyyəti ilə diqqət çəkməyib.
Bernal İspaniyanın U-16 və U-17 yığmalarına cəlb edilib, U-17 yığmasında isə 11 oyuna 1 məhsuldar ötürmə ilə fərqlənib.
Mark Bernal böyük futbolda hələ heç bir qənimət qazanmayıb.
“Transfermarkt” internet-portalı 17 yaşlı ispan dayaq yarmmüdafiəçisinin transfer dəyərini 1 milyon avro məbləğində qiymətləndirir.
