Argentinalı mütəxəssis Maurisio Poçettino Amerika Birləşmiş Ştatları (ABŞ) yığmasının baş məşqçisi vəzifəsinə təyin edilib.
Arena.az bu barədə ABŞ yığmasının mətbuat xidmətinə istinadən məlumat verir.
52 yaşlı mütəxəssis ABŞ yığmasını bu ölkədə keçiriləcək 2026-cı il dünya çempionatına hazırlayacaq. Tərəflər arasında müqavilənin müddəti 2026-cı ilin iyun ayının sonuna qədər qüvvədə olacaq.
ABŞ Futbol Federasiyasının (USSF) idman direktoru Mett Kroker Poçettinonun təyinatını belə şərh edib:
“Maurisio oyunçu inkişafı üçün dərin ehtiras və vahid və rəqabətli komandalar qurmaq üçün sübut edilmiş bacarığı olan çoxsaylı qalibdir. Onun təcrübəsi öz sözünü deyir və mən əminəm ki, o, bizim istedadlı komandamızın böyük potensialını gerçəkləşdirmək üçün düzgün seçimdir. Dünya səhnəsində uğura aparan bu maraqlı səyahətə çıxdığımız üçün Maurisionun göyərtədə olması bizi həyəcanlandırır”, – ABŞ Futbol Federasiyasının saytı Krokerdən sitat gətirir.
Öz növbəsində argentinalı mütəxəssis ABŞ yığmasının sükanı arxasına keçməsini şərh edib:
“ABŞ yığmasına qoşulmaq qərarı təkcə futbolla bağlı deyildi, söhbət bu komandanın və ölkənin keçdiyi yoldan gedir. Burada həqiqətən tarixi bir məqama nail olmaq üçün güc-qüvvə, ehtiras və iştaha məni ruhlandırdı. Oyunçular kimi ehtiraslı azarkeşlər qarşısında ABŞ-ın kişilərdən ibarət milli komandasına rəhbərlik etmək fürsəti əldən verə bilmədiyim bir xüsusdur. Mən istedad və imkanlarla dolu bir dəstə oyunçu görürəm və biz birlikdə bütün ölkənin fəxr edə biləcəyi xüsusi bir məqamı ərsəyə gətirəcəyik”.
Xatırladaq ki, Maurisio son olaraq İngiltərənin “Çelsi” klubuna rəhbərlik edib. O, cari ilin may ayının 21-də qarşılıqlı razılıq əsasında “zadəganlar”la əməkdaşlıq müqaviləsinə xitam vermişdi.
Maurisio Poçettino “Çelsi”nin baş məşqçisi vəzifəsinə 2023-cü ilin yayında təyin edilmişdi. Bu müddət ərzində “Poç”un rəhbərliyi altında “zadəganlar” bütün yarışlarda 51 oyuna çıxıblar. “Çelsi” bu oyunların 27-də qalib gəlib, 10 heçə-heçə edib, 14 dəfə məğlub olub.
Poçettinonun “Çelsi”si 2023/2024-cü illər mövsümündə İngiltərə Premyer Liqasını 63 xalla 6-cı pillədə başa vuraraq, növbəti mövsümdə Konfrans Liqasında iştirak hüququ qazanıb.
Argentinalı mütəxəssis daha öncə İspaniyanın “Espanyol”, İngiltərənin “Sauthempton” və “Tottenhem”, həmçinin Fransanın PSJ klublarını da çalışdırıb.
