Lionel Messi, Anxel Di Mariya və Serxio Buskets karyeralarını Səudiyyə Ərəbistanının “Əl-Hilal” komandasında davam etdirəcəklər.
Arena.az xəbər verir ki, belə bir iddia ilə Səudiyyə Ərəbistanlı futbol təhlilçisi Xalid Əl-Şenaif çıxış edib.
O, PSJ-nin hücumçusu Lionel Messi, “Yuventus”un yarımmüdafiəçisi Anxel Di Mariya və “Barselona”nın dayaq yarımmüdafiəçisi Serxio Busketsin “Əl-Hilal”a keçəcəyini bildirib. Ərəb təhlilçi SBC kanalının efirinə bunları söyləyib:
“Messi və Di Mariyanın klubları ilə müqaviləsi bu mövsümün sonunda başa çatır. Buskets bu yaxınlarda “Barselona”dan gedişi haqda elan edib. Beləliklə, adıçəkilənlər davam üçün pullu Səudiyyə liqasına yollanacaqlar”.
35 yaşlı Messinin PSJ ilə müqaviləsinin müddəti cari mövsümün sonunda başa çatır. İspaniyanın “Barselona” klubunun yetirməsi olan futbolçu 2004-2011-ci illər aralığında məhz Kataloniya təmsilçisinin uğurları üçün çalışıb. O, bu komandada 778 matça çıxıb, 672 qola imza atıb və 303 məhsuldar ötürmə müəllifi olub. 2021-ci ilin yayından Fransa nəhəngi PSJ-də forma geyinən təcrübəli oyunçu Paris təmsilçisində də 73 matçda 31 qol və 35 məhsuldar ötürmə müəllifi olub. O, Argentina milli komandasında 174 oyuna 102 qol vurub.
Di Mariya “Yuventus”a 2022-ci ilin yayında gəlib. 35 yaşlı futbolçu Turin klubunda bütövlükdə 38 oyuna çıxıb, 8 qol və 7 asistlə yadda qalıb. O, əvvəllər PSJ (295 oyun, 93 qol, 119 asist), “Real” (190 oyun, 36 qol, 85 asist), “Benfika” (121 oyun, 15 qol, 28 asist), “Rosario Sentral” (39 oyun, 6 qol) və “Mançester Yunayted”də (32 oyun, 4 qol, 12 asist) də oynayıb. Təcrübəli oyunçu Argentina milli komandasında da 131 oyun keçirib, 29 qola imza atıb.
Buskets “Barselona”nın yetirməsidir. Hazırda 34 yaşı olan yarımmüdafiəçi 2008-ci ildən bu klubun əsas komandasında çıxış edirdi. O, Kataloniya təmsilçisinin əsas komandasında 721 matça çıxıb. Təcrübəli oyunçu bu görüşlərdə 18 qol və 45 məhsuldar ötürmə ilə yadda qalıb. Buskets İspaniya millisində də 143 oyuna çıxıb, 2 qol vurub.
