Karyerasını “İnter Mayami”də davam etdirəcək argentinalı hücumçu Lionel Messi 2021-ci ildə “Barselona”dan ayrılmasının təfərrüatını açıqlayıb.
Arena.az “Sport.es”ə istinadən Messinin sözlərini diqqətinizə çatdırır:
“Nədən iki il öncə “Barselona” ilə müqaviləni yeniləmədim və ayrılmalı olduğumu necə başa düşdüm? Bu, çətin qərar idi. Yenə deyirəm, bütün bunlar artıq, keçmişdə qalıb. Bu, xoşagəlməz mərhələ idi. Ailəmlə mənim İspaniyada qala biləcəyim xəyalı ilə yaşayırdıq: mən məşq edir, uşaqlar məktəbə gedirdilər.
Yeni müqavilənin imzalanması ərəfəsində gecə mənə dedilər ki, müqavilə bağlamaq mümkün deyil və klubdan ayrılmalıyam. Başqa kluba keçmək üçün tələsik qərar verməli oldum. Bu xüsusda yaşadıqlarımız böyük bir sınaq idi”.
Messi 18 il (2003-2021) “Barselona”da çıxış edib, komanda ilə çoxsaylı titullar qazanıb. 2021-ci ilin yayında isə o, gözlənilmədən Kataloniya klubundan ayrılaraq Fransanın PSJ klubuna keçib. Bu yay Paris təmsilçisindən də ayrılan Messinin “Barselona”ya qayıdacağı ehtimal edilsə də, bu, baş tutmayıb. Argentinalı forvard yenidən bu klubla problemlər yaşamamaq üçün MLS təmsilçisi “İnter Mayami”dən aldığı təklifi qəbul edib.
