İngiltərənin “Arsenal” klubunda əsas komandanın baş məşqçisi Mikel Arteta ilə müqavilənin müddəti artırılıb. Arena.az xəbər verir ki, bu barədə London təmsilçisinin rəsmi saytı məlumat yayıb.
40 yaşlı mütəxəssislə müddəti 2024/25 mövsümünün sonunadək olan müqavilə imzalanıb. Onun əvvəlki sözləşməsinin müddəti 2023-cü ilin yayına qədər idi.
Mikel Arteta 2019-cu ilin dekabr ayından London təmsilçisinə rəhbərlik edir. İspaniyalı mütəxəssis indiyə qədər “Arsenal”ı 127 matça çıxarıb. Bu oyunlarda 69 qələbə qazanan londonlular, 22 heç-heçə edib, 36 məğlubiyyətə üzülüblər.
Komanda Artetanın rəhbərliyi altında İngiltərə Kubokunu və ölkə Super Kubokunu qazanıb. Bu mövsüm Premyer Liqada UEFA Çempionlar Liqasına vəsiqə uğrunda mübarizə aparan “topçular” sona 4 tur qalmış 63 xalla 4-cü pillədə yer alıb.
Sonda onu da xatırladaq ki, “Arsenal” Artetanın baş məşqçilik etdiyi ilk komandadır. O, daha öncə İngiltərənin “Mançester Siti” klubunda Xosep Qvardiolanın köməkçisi kimi çalışıb – 2016-2019-cu illər aralığında.
