“Fənərbaxça”nın baş məşqçisi Joze Mourinyo verdiyi müsahibəsi ilə futbol ictimaiyyətinin diqqətini yenidən özünü cəlb edib.
Arena.az “HT Spor” dərgisinə istinadən məlumat verir ki, portuqal mütəxəssis “Roma”nın sükanı arxasında 2023-cü il Avropa Liqasının “Sevilya”ya qarşı final oyunu haqda söhbət açıb.
Xatırladaq ki, “canavarlar” əsas və əlavə vaxtı 1:1 hesabı ilə başa çatmış həmin oyunun penaltilər silsiləsində 1:4 hesablı məğlubiyyətə üzülmüşdülər. Oyun həqiqətən də yanlış hakim qərarları ilə yadda qalmışdı. “Mour” isə oyundan sonra baş hakim başda olmaqla, oyunun ədalət təmsilçilərini söyüb-batırmışdı.
“VAR və hakimlər 2023-cü ildə Avropa Liqasını qazanmayacağıma qərar verdilər. Milyon adam deyəcək ki, o zaman xeyrimizə açıq-aşkar penalti verilməmişdi. Mən öləcəyəm, amma o finalı heç vaxt unutmayacağam. Bu il də iki saatlıq gərgin mübarizədən sonra “Lill” ilə oyunun son dəqiqəsində çox qəribə penalti təyin edildi (söhbət Çempionlar Liqasının 3-cü təsnifat mərhələsinin cavab oyunundan gedir – redaktorun qeydi).
Xatırladaq ki, ilk oyunda “Fənərbaxça”nı evdə 2:1 hesabı ilə məğlub etmiş “Lill”, İstanbuldakı cavab oyununda 1:1 hesablı heç-heçəni əlavə vaxtın 118-ci dəqiqəsində penaltidən vurduğu qolla təmin edərək, Çempionlar Liqasına vəsiqə qazanıb.
