Azərbaycan boksçusu Bilalhəbaşi Nəzərov Monteneqroda gənclər arasında keçirilən dünya birinciliyini gümüş medalla başa vurub.
Arena.az xəbər verir ki, Monteneqronun Budva şəhərində gənc boksçular arasında təşkil olunmuş dünya birinciliyində final görüşlərinə start verilib.
Mərhələnin ilk günündə Azərbaycan millisinin üzvü Bilalhəbaşi Nəzərov (48 kq) rinqə çıxıb.
O, həlledici görüşdə Safyiddin Sabirovla (Özbəkistan) qarşılaşıb. Görüş rəqibin 5:0 (29:28, 29:28, 29:28, 29:28, 29:28) hesablı qələbəsi ilə başa çatdığından boksçumuz dünya birinciliyini gümüş medalla başa vurub.
Bu, milli komandamızın mundialda rəsmiləşən 4-cü mükafatı olub. Boksçularımızdan daha öncə Məhəmmədəli Qasımzadə (60 kq), Zidan Hümbətov (51 kq) və Aynur Mikayılova (57 kq) bürünc medal qazanıblar.
Qeyd edək ki, sabah keçiriləcək final mərhələsinin ikinci günündə Əli Abdullayev (63,5 kq) də rinqə çıxacaq. O, çempionluq görüşündə Abdulaziz Jurakulovla (Özbəkistan) döyüşəcək.
