Almaniya millisinin baş məşqçisi Yulian Nagelsman “Qızıl top”a namizədlər arasında yer almamış yarımmüdafiəçi Camal Musiala haqda danışıb.
Arena.az xəbər verir ki, “Bayern”in aparıcı futbolçusunun bu siyahıda yer almaması ilə yanaşı, alman mütəxəssis “Bayer”in lideri, alman yarımmüdafiəçi Florian Virtsin də gələcəkdə bu mükafatı almaq imkanlarını qiymətləndirib:
“Bu surətdə davam etsələr, hər ikisi nə vaxtsa “Qızıl top”a namizəd olacaq. Sonra isə hər ikisinin onu bir dəfədən çox qazanmaq imkanı var”.
Yulian Nagelsman Florian Virts və Camal Musialanın eyni klubda nə vaxtsa oynayıb-oynamayacağı ilə bağlı sualı da cavablayıb:
“Mən bunu təsəvvür edə bilərəm, amma bu, çox baha olacaq. “Flo”nun “Bayer”də müqaviləsini Rudi Föller imzalayıb. Kim bilir, bəlkə də Camal Leverkuzenə yollanacaq. Hər halda, onları klub səviyyəsində birləşdirmək çox baha qiymətə başa gələcək”, deyə Nagelsman vurğulayıb.
“Bayern”in və Almaniya yığmasının yarımmüdafiəçisi Yozua Kimmix də ilin ən yaxşı futbolçusu üçün “Qızıl top” mükafatına iddialılar siyahısında Camal Musialanın namizəd təqdim edilməməsi ilə bağlı çaşqınlığını ifadə edib. Alman futbolçunun bu barədə fikrini təqdim edirik:
“Mən bu qərarı başa düşürəmmi? Xeyr. Bunun, hansı meyarlarla qəbul edildiyini bilmirəm. Ən yaxşı futbolçular bu siyahıda olmalıdırlar. Camal isə mütləq onlardan biridir”.
“Bayern”in idman direktoru Maks Eberl də Camal Musialanın adının namizədlər sırasında olmamasına münasibətini bildirib:
“Camal Musialanın bu siyahıda olmaması bizi çox təəccübləndirdi. Bu, tamamilə anlaşılmazdır”, deyə Eberl təəccüblə vurğulayıb.
