Futbol üzrə Azərbaycan Premyer Liqasının 2022/2023 mövsümünün sonuncu mükafatçısı da bəlli olub. Arena.az xəbər verir ki, “Qarabağ”la “Sabah”ın ardınca “Neftçi” də ilk “üçlük”dəki yerini təmin edib.
Bu, ölkə çempionatının 29-cu turun oyunlarından sonra rəsmiləşib. Bakılılar səfərdə “Sumqayıt”ı 4:0 hesabı ilə məğlub edib və xallarının sayını 60-a çatdırıb.
“Ağ-qaralar” ölkə çempionatları tarixində 21-ci dəfə mükafat alacaq. Bu, yarışın tarixində yeni rekorddur. Öz göstəricisini yeniləyən “Neftçi” bunadək 20 dəfə medalçılar sırasına düşmüşdü.
Paytaxt klubu 9 dəfə – 1992, 1995/1996, 1996/1997, 2003/2004, 2004/2005, 2010/2011, 2011/2012, 2012/2013 və 2020/2021 mövsümlərində çempion titulunu qazanıb. “Ağ-qaralar” 5 dəfə gümüş (2000/2001, 2006/2007, 2018/2019, 2019/2020, 2021/2022), 6 dəfə bürünc (1994/1995, 1998/1999, 1999/2000, 2005/2006, 2007/2008, 2017/2018) mükafat qazanıb.
Xatırladaq ki, “ağ-qaralar” ardıcıl 6-cı mövsümü “üçlük”də başa vuracaq. Amma həm paytaxt klubunun, həm də “Qarabağ”la “Sabah”ın medalının əyarına qarşıdakı turlarda aydınlıq gələcək.
