“Əl-Hilal”ın braziliyalı ulduz hücumçusu Neymar 2017-ci ildə “Barselona”dan PSJ-yə keçidi haqda söhbət açaraq, bu keçidini əsaslandırıb.
Arena.az nüfuzlu italyan jurnalist-insayder Fabritsio Romanoya istinadən, brazilyalı ulduzun bu barədə fikrini təqdim edir:
“Bu, nəsə şəxsi bir xüsusdur. Açığı, maliyyə baxımından PSJ-nin təklifi “Barselona”dakı təklifimdən daha yaxşı idi… və orada da braziliyalılar vardı. Mən braziliyalılarla oynamaq istəyirdim. Tyaqo Silva, yeni imzalanmış Daniel Alves, Markinyos, Lukas Moura vardı. Onların hamısı mənim dostlarımdır”, deyə “Ney” vurğulayıb.
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış edib və “blauqrana”nı öz istəyi ilə tərk edərək, PSJ-yə keçib. Bu, hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Avropada debütü “Barselona” ilə başlamış Neymar PSJ-də də 6 il keçirdikdən sonra 2023-cü ilin yayında “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib.
Təcrübəli hücumçu “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı hücumçunun transfer dəyərini 15 milyon avro məbləğində qiymətləndirir.
