Azərbaycan Basketbol Liqasının 2024/2025 mövsümünün debütantlarından olan “Ordu” klubu heyətini komplektləşdirməyə davam edir.
Arena.az xəbər verir ki, sözügedən klub heyətinə bir neçə yerli və legioner oyunçu cəlb edib.
Yeni oyunçulardan biri amerikalı Camaure Qreqqdir. Boyu 200 sm olan Qreqin sonuncu klubu Qazaxıstan “Barsı”sı olub. Amerikalı basketbolçu ilə 2 illik müqavilə imzalanıb.
Debütant ispaniyalı basketbolçu Roke ilə də anlaşıb. 182 sm boya malik oyunçunun sonuncu klubu ölkəsində “Villaqarsiya” olub. Onunla 1 illik müqavilə imzalanıb.
Sözügedən komanda təcrübəli basketbolçu Rüstəm Əliyevi də heyətinə qatıb. 196 sm boyu olan basketbolçu son mövsümü Azərbaycan çempionu “Sabah”ın heyətində keçirib. Rüstəm Əliyevin həm də komandanın kapitanı olacağı diqqətə çatdırılıb.
“Ordu” gənc oyunçu Emil Əliyevi də sıralarına cəlb edib. 192 sm boya malik Azərbaycanın U-16 millisinin üzvü qarşıdakı mövsümü debütantın heyətində keçirəcək. Əliyevlə 1 illik müqavilə imzalanıb.
“Lənkəran”da amerikalı basketbolçu
Azərbaycan Basketbol Liqasında yeni mövsümə hazırlaşan digər klublar da heyətlərini gücləndirməyə davam edirlər. “Lənkəran” amerikalı basketbolçu Filmon Qebriyhiti heyətinə qatıb. Hücumçu mövqeyində çıxış edən 25 yaşlı oyunçu 205 sm boya malikdir.
Lənkəran təmsilçisi 28 yaşlı müdafiəçi Orxan Abbasovla da danışıqları müsbət yekunlaşdırıb. 179 sm boya malik təcrübəli oyunçunun son klubu “Gəncə” olub. O, Rusiyanın “Simferopol”, “TimTim”, “Orlan” və “Moskva” klublarının da formasını geyinib.
“Lənkəran” bundan əvvəl yerli basketbolçular Rəşid Abbasov, Zumrat Ankbazov, Varid Ağasızadə və Mirməcid İsmayılovu da heyətinə qatmışdı.
“Neftçi”dən “Gəncə”yə
Orxan Abbasovun keçmiş klubu “Gəncə” də növbəti transferlərini rəsmiləşdirib. “Sarı-göylər” Azərbaycan millisinin basketbolçusu Cəbrayıl Əkbərovla gücləniblər. “Cibo” ləqəbli hücumçu ilə mövsümün sonuna kimi müqavilə imzalanıb. 195 sm boya malik Əkbərov “Gəncə”də 11 nömrəli formanı geyinəcək. Əkbərov “Gəncə” üçün yad sima deyil. Forvard 2022/2023 mövsümündə də bölgə təmsilçisində çıxış edib. O, bu komanda ilə birlikdə Azərbaycan kubokunun qalibi və liqanın gümüş mükafatçısı olub. Cəbrayıl ötən mövsümü “Sərhədçi”də keçirib. O, Çempionlar Liqasının təsnifat mərhələsində “Sabah”ın da formasını geyinib.
“Gəncə” Vladislav Frolovu da heyətinə qatıb. “Neftçi”nin sabiq mərkəz oyunçusu yeni klubu ilə mövsümün sonuna kimi müqavilə bağlayıb. 26 yaşlı ukraynalı basketbolçu “Gəncə”də 13 nömrəli formada oynayacaq.
Qeyd edək ki, “sarı-göylər” daha əvvəl yerli basketbolçulardan Elşad Şirzadov, Maqsud Rüstəmov, Nicat Hüseynov, əcnəbilərdən isə Lavon Holland, Kaan Yıldırımkanlı, Cordan Forbs, Barrel Romelo və Marqus Gilsonla müqavilə bağlamışdı.
“Abşeron” da növbəti legioner basketbolçunun transferini açıqlayıb. 196 sm boya malik amerikalı Aubri Makalpaynla mövsümün sonuna qədər müqavilə imzalanıb. O, ötən mövsümü də ölkəmizdə keçirib. Legioner “Naxçıvan”ın (ötən mövsüm “Xəzri” adlanırdı) heyətində çıxış edib.
“Abşeron” buna qədər heyətini amerikalı basketbolçular Sedrik Conson, Jaja Davis, Lari Robinson, Calen Şou, Villiam Cenkins, yerli basketbolçulardan isə Hüseyn Məmmədov, Azər İbrahimov və İsmayıl Abdullayevlə gücləndirib. Ötən mövsüm komandanın heyətində olan Nəcəf Babayev və Elçin Salmanzadə ilə isə müqavilənin müddəti daha bir il artırılıb.
“Naxçıvan” da heyətini gücləndirməkdə davam edir. Sözüedən klub Dmitri Juravlovla 1 illik müqavilə imzalayıb. 200 sm boya malik basketbolçu ötən mövsümü “Sərhədçi”də keçirib. 22 yaşlı oyunçu Ukraynanın U-20 millisinin də şərəfini qoruyur.
“Sabah” və “Naxçıvan”dan qələbə
Sonda onu da qeyd edək ki, Azərbaycan çempionatının iştirakçıları heyətlərini gücləndirməklə yanaşı, yoxlama oyunları keçirməyə də başlayıblar. “Naxçıvan” və “Ordu” kollektivləri arasındakı yoxlama görüşündə birincilər 66:57 hesablı qələbəyə seviniblər. Oyun Memarlıq və İnşaat Universitetinin idman zalında keçirilib.
“Sabah” və “Quba” komandaları da yoxlama görüşündə üz-üzə gəliblər. Bakı İdman Sarayında keçirilən qarşılaşma birincilərin 91:70 hesablı qələbəsi ilə yekunlaşıb.
Qeyd edək ki, ABL-də yeni mövsüm oktyabrın 18-də başlayacaq.
