Avropa Liqasının Liqa mərhələsində “Qarabağ”ın rəqibi olan Lion “Olimpik”i 2 futbolçusu – Orel Manqala və Adrielsonla yollarını ayırıb.
Arena.az bu barədə Fransa klubunun rəsmi saytına istinadən xəbər verir.
Liqa 1 təmsilçisi hər iki oyunçusunu icarəyə verib. Orel Manqala “Everton”a, Adrielson isə “Botafoqo”ya keçib. Manqala 2025-ci ilin 30 iyununa, Adrielson isə 2024-cü ilin 31 dekabrına qədər icarədə çıxış edəcək.
Orel Manqala bu ilin fevral ayından Lion “Olimpik”ində çıxış edirdi. Fransa klubu həmin vaxt onu “Nottingem Forest”dən icarəyə götürmüşdü. Bu yay isə 23,4 milyon avro ödəyən Lion klubu Manqalanın transfer hüquqlarını da almışdı. 26 yaşlı mərkəz yarımmüdafiəçisi “Olimpik”də 13 oyuna çıxıb, 2 qola imza atıb. “Ştutqart”, “Hamburq”, “Anderlext” kimi klublarda da çıxış etmiş futbolçu, Belçika yığmasında 19 oyun keçirib.
Adrielson da bu ilin yanvarında 3,58 milyon avro müqabilində elə “Botafoqo”dan “Olimpik”ə keçmişdi. 26 yaşlı braziliyalı mərkəz müdafiəçisi Liqa 1 təmsilçisində cəmi 4 matç keçirib. “Sport Resife”, “Botafoqo” və “Əl-Vasl”da çıxış etmiş braziliyalı oyunçu ölkəsinin U-17 və U-23 yığmalarında da oynayıb.
Manqalanı heyətinə qatmış “Everton” da Meyson Holqeyti “Vest Bromviç”ə icarəyə verib. 27 yaşlı ingiltərəli futbolçunun bu mövsümün sonunadək icarədə olacağı açıqlanıb.
“Barnsli”nin yetirməsi olan Holqeyt, 2015-ci ildən formasını geyindiyi “Everton”da 150 oyuna çıxıb, 5 qol vurub, 5 assist müəllifi olub. O, daha öncə də “Vest Bromviç”də, həmçinin “Barnsli”, “Şeffild Yunayted” və “Sauthempton”da icarədə olub.
“Everton” fransalı hücumçusu Nil Mopeni də 500 min avroya Marsel “Olimpik”inə icarəyə verib. Fransa nəhəngi 28 yaşlı forvardı bu mövsümün sonunadək satınalma şərti ilə icarəyə götürüb. Bir mövsümlük icarə üçün “Everton”a 500 min avro ödəniləcək.
Nil Mope peşəkar karyerasına “Nits”da başlayıb, “Sent Etyen”, “Brest”, “Brentford”, “Brayton” kimi klublarda da oynayıb. 2022-ci ildən “Everton”da forma geyinən fransalı oyunçu bu komandada 32 oyuna 1 qol vurub, 2 məhsuldar ötürmə verib. O, ötən mövsüm “Brentford”da da icarədə olub.
