Ozan Can Kökçü “Qroningen”ə qarşı 90 dəqiqə oynadı

Futbol üzrə Azərbaycan millisinin yarımmüdafiəçisi Ozan Can Kökçü Niderlandın “Eyndhoven” komandasında növbəti matçına çıxıb.

Arena.az xəbər verir ki, 25 yaşlı futbolçu Niderland Birinci Divizionunun 26-cı turu çərçivəsində keçirilmiş “Qroningen”lə oyunun iştirakçısı olub.

“Eyndhoven” doğma meydanda baş tutan bu oyundan məğlubiyyətlə ayrılıb – 0:3.

Ozan Can bu görüşə start heyətdə başlayıb və sonadək mübarizə aparıb. Cari mövsümdə 7 qol vurub, 2 məhsuldar ötürmə müəllifi olmuş Kökçü bu dəfə fərqlənə bilməyib.

Sonuncu dəfə ötən ilin dekabr ayında qələbə qazanmış “Eyndhoven” yeddi oyundur 3 xala həsrətdir. Komanda son oyunlarında 3 heç-heçə edib, 4 məğlubiyyətə üzülüb. “Eyndhoven” cari mövsümdə qazandığı 32 xalla 20 kollektiv arasında 14-cü pillədə qərarlaşıb.

Xatırladaq ki, Ozan Can Kökçü “Eyndhoven”ə 2022-ci ilin yayında “Telstar”dan gəlib. Yarımmüdafiəçi daha öncə “Valveyk” və “Girəsunspor” komandalarının, həmçinin “Sabah”ın da uğurları üçün çalışıb. Ozan Azərbaycanın U-20 və U-21 yığmalarının da formasını geyinib, 2022-ci ildən isə əsas milliyə dəvət alır. O, “Eyndhoven”də bütövlükdə 65 oyuna çıxıb, 13 qola imza atıb, 2 məhsuldar ötürmə ilə yadda qalıb.