Bu ilin yayında “Turan Tovuz”dan ayrılan braziliyalı hücumçu Luis Henrike Paçu Lira bundan sonra “Kəpəz”in uğurları üçün çalışacaq.
Arena.az bu barədə Gəncə klubunun mətbuat xidmətinə istinadən məlumat verir.
Xəbərdə bildirilir ki, “Kəpəz” bu gün heyətinə yeni futbolçu cəlb edib. Bu, braziliyalı Paçu Liradır. Azad agent statusuna malik 28 yaşlı hücumçu ilə müqavilə cari mövsümün sonuna kimi nəzərdə tutulub.
Xatırladaq ki, 28 yaşlı forvard 2023-cü ilin yayında “Turan Tovuz”a keçmişdi. O, Premyer Liqa təmsilçisinin heyətində meydana çıxdığı 24 oyunda 5 qol və 2 məhsuldar ötürmə müəllifi olub.
Luis Henrike Paçu Lira daha öncə “Botafoqo”, “Qonsalense”, “Santa-Krus”, “Boavişta”, “Lemense”, “Atletiko” (Paraiba), “Sianorte”, “Trofense” kimi klublarda da forma geyinib.
Qeyd edək ki, Paçu “Kəpəz”in bu yay heyətinə qatdığı 9-cu legioner futbolçudur. Gəncə klubu daha öncə Paulo Rojerio (“Lenk”, Portuqaliya), Kərim L’Kuça (“Santa Koloma”, Andorra), Lassana Ndiaye (“Botev”, Bolqarıstan), Redon Mihana (“Erzeni”, Albaniya), Viktor Braqa (“Aqiya di Maraba”, Braziliya), Keverton Resende Markolino (“Hersilio Lus”, Braziliya), Valdemar Almeyda (“Səbail”) və Dioqo Verdaskanı (“Mirandes”, İspaniya) da heyətinə qatmışdı. Yerli oyunçulardan isə Elmir Tağıyev (“Səbail”), Nicat Süleymanov (“Araz-Naxçıvan”), Məmməd Hüseynov (“Zirə”), İlkin Qırtımov (“Qəbələ”), Orxan Əliyev (“Araz-Naxçıvan”), Rauf Hüseynli (“Qəbələ”), Turan Manafov (“Araz-Naxçıvan”) və Camal Cəfərov (“Sabah”, icarə) Gəncə klubuna cəlb olunmuşdu. Yeqor Xvalko, Ehtiram Şahverdiyev, Əli Səmədov, Vurğun Hüseynov, Tural Rzayev və Mahir Həsənovla da yeni müqavilə imzalanmışdı.
Elçin Əlicanov (“Zirə”), Vüsal Məsimov (“Səbail”), Mate Kvirkviya, Adama Niane, Martins Junior (“Zirə”), Olavale Onanuqa, İqor Rodriqes, Georgi Papunaşvili (“Zirə”), Rüfət Əhmədov, Latir Fall, Amil Yunanov, Kamran İbrahimov, Vurğun Hüseynov (karyerasını bitirdi) isə “Kəpəz”i tərk ediblər. Arzu Atakişiyev də “Difai”yə icarəyə verilib.
