“Tottenhem”in baş məşqçisi Angelos Postekoqlu İngiltərə çempionatında (Premyer Liqa) sentyabr ayının ən yaxşı məşqçisi seçilib.
Arena.az Premyer Liqanın rəsmi saytına istinadən məlumat verir ki, müvafiq mükafat avstraliyalı mütəxəssis üçün cari 2023/2024 mövsümündə ikincidir.
Xatırladaq ki, Postekoqlu avqust ayında da Premyer Liqanın ən yaxşı məşqçisi seçilmişdi.
“Tottenhem”in çalışdırıcısı ayın ən yaxşısı adına digər namizədlər – Mikel Arteta (“Arsenal”), Unai Emeri (“Aston Villa”), Eddi Hau (“Nyukasl”) və Yurgen Klopu (“Liverpul”) geridə qoyub.
Sentyabrda avstraliyalı mütəxəssisin rəhbərliyi altında “Tottenhem” “Börnli” (5:2), “Şeffild Yunayted” (2:1), “Liverpul” (2:1) üzərində qələbələr qazanaraq, “Arsenal”la heç-heçə edib (2:2). Bu isə 4 oyunda 10 xal deməkdir.
Postekoqlu “Tottenhem”ə italyan mütəxəssis Antonio Kontenin istefasından sonra gətirilib. O, cari ilin iyul ayının 1-dən vəzifəsinin icrasına başlayıb. “Mahmızlar” yunanəsilli avstarliyalı mütəxəssislə müddəti 2027-ci ilin iyun ayının sonuna qədər qüvvədə olacaq müqavilə imzalayıblar.
57 yaşlı Postekoqlu buna qədər 2021-ci ilin yayından çalışdırdığı “Seltik”də 2 dəfə Şotlandiya Premyer Liqasını və Liqa Kubokunu, həmçinin Şotlandiya Kubokunu qazanıb. Postekoqlunun Avstraliyanın U-17, U-20 və həmçinin əsas yığmasında böyük iş təcrübəsi var.
Xatırladaq ki, “Tottenhem” 8 turdan sonra İngiltərə Premyer Liqasının turnir cədvəlində 20 xalla liderdirlər. Eyni xala malik olan Londonun digər təmsilçisi “Arsenal” isə ikinci pillədə qərarlaşıb. İlk “üçlüy”ü son çempion “Mançester Siti” qapayır – “şəhərlilər”in 18 xalı var.
