“Qarabağ” akademiyasının komandaları Qətərə yollanır

“Qarabağ” klubunun futbol akademiyasının aşağı yaş qruplarından ibarət komandaları bu yay Qətərdə toplanış keçəcəklər.

Arena.az xəbər verir ki, bu barədə Ağdam klubunun rəsmi saytı məlumat yayıb.

Xəbərdə bildirilir ki, mayın 18-23-də keçiriləcək səfər çərçivəsində U-15 və U-17 “Aspire Academy Friendly Series”də iştirak edəcək.

Akademiyanın meneceri Nail Kərimov və koordinatoru Aftandil Hacıyevin başçılıq edəcəyi səfər çərçivəsində “Qarabağ”ın komandaları iki yoldaşlıq görüşündə qüvvəsini sınayacaq. Bu matçlar ayın 19-da və 21-də keçiriləcək. Bununla da Ağdam klubunun akademiyasının mövsüm ərzindəki beynəlxalq səfərlərinin sayı 8-ə çatacaq.

Yeri gəlmişkən, Ağdam klubunun futbol akademiyasının komandaları “Junior World Cup”da iştirak edəcək. U-9 və U-14 Türkiyənin Antalya şəhərində təşkil olunacaq yarışa qatılacaqlar.

Mayın 17-19-da baş tutacaq turnirdə U-9-un rəqibləri arasında “Fatih Karagümrük”, “Antalyaspor”, “Beşiktaş” və “Paxtakor” (Özbəkistan) kimi komandalar olacaq. U-14 isə “Antalyaspor”, “Oina” (Qazaxıstan), “Sabah”, “Dinamo” (Batumi, Gürcüstan) və digər rəqiblərlə mübarizə aparacaq.