Xəbər verdiyimiz kimi, “Brentford”un hücumçusu Ayvan Touni mərc oyunlarında qumarbazlıq etməsi səbəbilə futboldan uzaqlaşdırılıb.
Arena.az xəbər verir ki, futbolçunun bu fəaliyyəti ilə bağlı təhqiqatdan sonra futbolçuya kəsilmiş cəzanın təfərrüatı məlum olub.
Qanunsuz fəaliyyətinə görə Touni İngiltərə Futbol Assosiasiyası (FA) tərəfindən 8 ay müddətində futboldan uzaqlaşdırılıb. İngiltərə mətbuatında yayılmış məlumata görə, əvvəlcə futbolçuya 15 aylıq cəza verilməsi nəzərdə tutulubmuş. Futbolçunun cəzasının endirilməsinə səbəb təhqiqatın müəyyən faktları sübuta yetirməsi olub. Belə ki, qumar asıllığı olması həkim müayinəsi ilə sübuta yetirilmiş Touni bunu səmimi etiraf edərək təqsirini boynuna alıb.
Bununla belə, Touni özünün oynamadığı oyunlara mərc çəkib. Bu məqam İngiltərə Futbol Assosiasiyasının raportunda əksini tapıb.
Maraqlı məqamlardan biri Touninin öz komandasının məğlubiyyətinə mərc qoşması olub. 27 yaşlı futbolçu qumarbaz karyerasının böyük hissəsini “Nyukasl”ın futbolçusu ikən yaşayıb. Bu məqamlar xüsusi təhqiqat komissiyası tərəfindən sübuta yetirilib. Touni “Nyukasl” üzərindən mərc qoşduğu 7 oyunda 13 dəfə öz komandasının məğlub olacağına “ hesab atıb”. Buna rəğmən, bəxtli qumarbaz canını ağır cəzadan qurtara bilib. “Nyukasl”ın oyunçusu olmasına rəğmən, “Uiqan”da icarə əsasında çıxış etməsi bir səbəb kimi baxışdan keçirilib və ağır cəza Tounidən yan ötüb.
Həmçinin Touninin 2018-ci ilin Mart ayında komanda yoldaşına start onbirliyində başlayacağı bir oyun üçün öncədən məlumat verdiyi sübuta yetirilib.
İngiltərə Futbol Assosiasiyasının raportunda verilmiş məlumata görə, Touni özünün sahədə olduğu 9 oyunda 15 dəfə qol vuracağı yöndə mərcdə iştirakı haqda da bənd yer alıb.
Ayvan Touni 2020-ci ilin sentyabrından “Brentford”un uğurları üçün çalışır. O, bu mövsüm Premyer Liqada meydana çıxdığı 33 oyunda 20 qola imza atıb, İngiltərə kubokunda isə 2 matç keçirib, 1 qol vurub, 1 məhsuldar ötürmə ilə yadda qalıb. Bütövlükdə o, bu klubun heyətində 124 matçda 68 qol və 21 asist müəllifi olub.
Touni “Piterboro Yunayted”, “Northempton Taun”, “Skantorp Yunayted”, “Uiqan”, “Şrusberi Taun”, “Barnsli”, “Nyukasl” kimi klubların da formasını geyinib.
Hücumçu bu ilin mart ayında İngiltərə milli komandasında da ilk rəsmi matçını keçirmişdi.
