“Mançester Siti”nin baş məşqçisi Xosep Qvardiola “şəhərlilər”in son uğursuzluqlarının əsas səbəbinin nə olduğu barədə fikrini paylaşıb.
Arena.az “Sky Sports” dərgisinə istinadən, ispan mütəxəssisin bu barədə fikrini təqdim edir:
“Ola bilsin ki, indi mən, bizim nə etdiyimizi başa düşürəm. Çünki bəzən biz zədələrlə üzləşirik və biz uzun illərdir inanılmaz dərəcədə sabit olmuşuq, bilirsinizmi? Əsas, ən mühüm səbəb isə yeddi-səkkiz vacib zədəli futbolçumuzun varlığıdır. Hər üç gündən bir isə sonrası getdikcə çətinləşir. Amma mən komandanı, onların münasibətini, məşqin necə getdiyini, onların bizim icra etməyə çalışdığımız işə nə qədər diqqət yetirdiyini görürəm”, deyə Qvardiola vurğulayıb.
Xatırladaq ki, İngiltərə Premyer Liqasında keçirdiyi son 10 oyunda “Mançester Siti” 2 dəfə qalib gəlib, 2 dəfə heç-heçə edib və 6 dəfə məğlub olub.
Müvafiq uğursuzluq silsiləsi Xosep Qvardiolanın məşqçilik karyerası ərzində ilk dəfə və ən bərbad silsilədir.
Premyer Liqanın 18 oyunundan 28 xalla “Mançester Siti” yarış cədvəlinin 7-ci pilləsində qərarlaşıb. Yarış cdəvəlinə 17 oyundan 42 xalla “Liverpul” başçılıq edir.
