“Zirə”nin baş məşqçisi Rəşad Sadıqov Azərbaycan Premyer Liqasının 8-ci turu çərçivəsində “Kəpəz”ə qarşı keçirdikləri oyunu şərh edib.
Arena.az xəbər verir ki, o, 3:0 hesabıyla qalib gəldikləri matçdan sonra baş tutan mətbuat konfransında bunları söyləyib:
“Kəpəz” neçə tur idi ki, uduzurdu. Onlarda baş məşqçi dəyişikliyi baş vermişdi. Son turlarda da hər zaman rəqiblər üzərində müəyyən dəqiqələrdə şansları olurdu. Fərqlənə bilsələr, matç fərqli məcrada gedərdi. “Sabah”ı 2:0 məğlub edirdilər. Bu məqamları nəzərə alararaq düşünürdük ki, matç bizim üçün çətin keçəcək. İlk hissə həqiqətən belə oldu. Rəqib bizə çoxlu pressinq tətbiq etdi. Bəzən pressinqdən çıxa bilirdik, bəzən isə çətinlik çəkirdik. Qapımız qarşısında çoxsaylı standart vəziyyət də oldu. İkinci hissədə oyun bizim üçün daha rahat keçdi, inamlı qələbə qazandıq. Futbolçuları bu münasibətlə təbrik edirəm”.
Rəşad Sadıqov Salifu Sumanı əvəzləməsinin səbəbini də açıqlayıb:
“Onun dəyişilməsi sarı vərəqə ilə bağlı idi. Futbolçuya yaraşmayan vərəqə oldu. Ondan sonra rəqibin futbolçuları ilə bir-iki epizodda mübahisə etdi. Bilirik ki, təxribata gedən futbolçudur. Ona görə də, fasilədə onu dəyişdik”.
“Kəpəz”in baş məşqçisi Azər Bağırov isə komandasının məğlubiyyətinə belə şərh verib:
“Oyundan-oyuna nələrisə daha yaxşı edirik. Amma yenə də konsentrasiyadan düşürük. İlk hissədə daha yaxşı mübarizə apardıq. Hər iki hissədə bağışlanmayacaq səhvlər etdik. “Zirə”ni təbrik edirəm. Hər bir oyunun özünün istəyi, tapşırığı var. Futbolçuları da get-gedə tanıyırıq. “Qara zolaq”dan çıxmaq üçün müəyyən planlar cızırıq. Paçunun, Pananın bizə qoşulması da xeyrimizə olacaq. Oyun planında da bəzi dəyişikliklər var. Onları rotasiya edib yoxlayırıq. Mən gələndən üç oyun keçirmişik. “Araz-Naxçıvan”la matçda qola qədər pis mübarizə aparmaqdıq. “Zirə” ilə görüşdə də qola qədər pis deyildik. Futbolçular bəzi məsələləri anlayırlar ki, nə etmək lazımdır. Bunu 90 dəqiqəlik çərçivəyə salmaq lazımdır. Qışa qədər transferlərimiz tamamlanıb. Amma hər şeyi zaman göstərəcək. Bir oyunçu da dünən bizə qoşuldu”.
