“Səbail”in yarımmüdafiəçisi Rahid Əmirquliyev “dənizçilər”in heyətində 100-cü çempionat oyununu keçirib. Arena.az xəbər verir ki, 33 yaşlı yarımmüdafiəçinin yubileyi Azərbaycan Premyer Liqasının 16-cı turuna təsadüf edib.
“Qəbələ” ilə səfər qarşılaşması (1:2) onun üçün 100-cü matçla əlamətdar olub.
Rahid Əmirquliyev Bakı təmsilçisində 5-ci mövsümünü keçirir. O, bu müddətdə 1 qol vurub.
Əmirquliyevin debütü də “Qəbələ”yə qarşı səfərdəki matçda gerçəkləşib. Rahid 2018-ci il avqustun 12-də keçirilən görüşdə (0:3) meydana çıxıb.
Qeyd edək ki, Rahid “Səbail”in heyətində Premyer Liqada 100 oyun keçirən ilk futbolçudur.
