“Arsenal”ın sol vingeri Rahim Sterlinq UEFA Çempionlar Liqasında dörd fərqli klubda oynayan ilk ingiltərəli futbolçu olub.
Arena.az xəbər verir ki, o, bunu UEFA Çempionlar Liqasının Liqa mərhələsinin 1-ci turunda İtaliya təmsilçisi “Atalanta”ya qarşı oyunda reallaşdırıb.
Vinger “Arsenal”a qədər “Liverpul”, “Mançester Siti” və “Çelsi” klublarının da heyətində sözügedən turnirdə çıxış edib.
Qeyd edək ki, İtaliyada keçirilən “Atalanta” – “Arsenal” matçında qalib müəyyənləşməyib – 0:0.
Xatırladaq ki, müqavilə ilə “Çelsi”yə məxsus olan Rahim Sterlinq “Arsenal”a bu ilin yayında icarə müqaviləsi əsasında keçib. Keçid ödənişsiz əsasda, 2024/2025-ci illər mövsümünün sonuna qədər hesablanıb. 29 yaşlı vinger “topçular”ın heyətində hələlik 2 oyuna çıxıb və fərqlənə bilməyib.
Rahim Sterlinq futbola “Alfa və Omeqa” klubunda qədəm qoyub. İngilis vinger karyerası ərzində KPR, “Liverpul”, “Mançester Siti” və “Çelsi”də oynayıb.
Geridə qalmış 2023/2024 mövsümündə Sterlinq “Çelsi”nin heyətində bütün yarışlarda 43 oyuna 10 qol və 8 məhsuldar ötürmə ilə fərqlənib.
Sterlinq 2012-ci ilin noyabrında debüt etdiyi İngiltərə yığmasının heyətində 82 oyun keçirib, 20 qol vurub və 27 məhsuldar ötürmə verib.
Rahim Sterlinqin qənimətlər muzeyindəki bütün kuboklar “Mançester Siti”nin adı ilə bağlıdır – İngiltərə Premyer Liqası çempionluğu (4 dəfə), İngiltərə Kuboku, İngiltərə Liqa Kuboku (5 dəfə) və İngiltərə Super Kuboku (2 dəfə). Həmçinin Sterlinq 2019-cu ildə İngiltərədə ilin oyunçusu seçilib.
“Transfermarkt” internet-portalı 29 yaşlı ingilis sol vingerin transfer dəyərini 35 milyon avro məbləğində qiymətləndirir.
