Ramil Şeydayev 27 dəqiqə oynadı, komandası xal itirdi – Video

Futbol üzrə Azərbaycan millisinin hücumçusu Ramil Şeydayev Türkiyənin “Kocaelispor” komandasının heyətində növbəti matçına çıxıb.

Arena.az xəbər verir ki, sözügedən komanda bu gün TFF Birinci Liqanın 24-cü turu çərçivəsində “Keçiörengücü” ilə qarşılaşıb.

Səfərdə baş tutan görüş Kocaeli klubunun xal itkisi ilə yekunlaşıb. Ramilin komandası meydanı heç-heçə ilə tərk edib – 2:2.

Şeydayev bu oyunun 63-cü dəqiqəsində, hesab 1:1 olarkən meydana buraxılıb. Amma milli üzvü komandasına heç nə ilə kömək edə bilməyib.

Ardıcıl üçüncü oyunda xal itirən “Kocaelispor” bu nəticədən sonra 44 xalla turnir cədvəlinin üçüncü pilləsində qərarlaşıb. Cari mövsümdə 5-ci dəfə 1 xalla kifayətlənən futbolçumuzun komandası, 13 qələbəyə sevinib, 6 məğlubiyyətə üzülüb.

Xatırladaq ki, Ramil Şeydayev “Kocaelispor”a yanvarın 17-də Tailandın “Buriram Yunayted” klubundan 800 min avro qarşılığında transfer olub. Onun Türkiyə klubu ilə 2025-ci ilin 30 iyununa kimi müqaviləsi var. Millimizin üzvü Kocaeli təmsilçisində 5 oyuna çıxsa da, hələlik, məhsuldar fəaliyyəti ilə diqqət mərkəzinə düşə bilməyib.