Futbol üzrə Azərbaycan Premyer Liqasının 30-cu turu “Qəbələ”nin hücumçusu Ramon Maçado üçün ikiqat əlamətdar olub. Arena.az xəbər verir ki, braziliyalı futbolçu Azərbaycan çempionatında 50-ci oyununu keçirib.
“Neftçi” ilə matçda hesabı açan legioner Premyer Liqada 10-cu qolunu vurub.
2022-ci ilin yayında “Qəbələ”yə keçən Ramon Maçado bunadək məhz “Neftçi”də çıxış edib. O, Bakı klubunda 24, “qırmızı-qaralar”ın heyətində 26 çempionat görüşündə şans qazanıb. Ramon hər iki komandanın forması ilə eyni sayda – 5 qola imza atıb.
“Neftçi” ilə görüş “Qəbələ”nin daha iki braziliyalı futbolçusu üçün əlamətdar olub. Rafael Utziq və Felipe Santos Premyer Liqada yubiley matçına çıxıb. Yalnız “Qəbələ”də çıxış edən Rafael 75-ci çempionat qarşılaşmasında şans qazanıb. Felipe isə Premyer Liqadakı oyun sayını 50-yə çatdırıb. O, əvvəllər “Şamaxı”da forma geyinib. Bu matçlarda Utziq 14, Felipe 9 dəfə fərqlənib.
Xatırladaq ki, “Qəbələ” səfər matçında 2:1 hesablı qələbə qazanıb.
