Rayan Giqqz Uels millisindən kənarlaşdırıldı

Futbol üzrə Uels milli komandasının baş məşqçisi Rayan Giqqz müvəqqəti olaraq vəzifəsindən kənarlaşdırılıb.

Arena.az xəbər verir ki, bu barədə Uels Futbol Assosiasiyasının rəsmi saytı məlumat yayıb.

Xəbərdə Uels yığmasının DÇ-2022-nin seçmə mərhələsi çərçivəsində Belçika və Çexiya ilə oyunlara Robert Peycin rəhbərliyi altında çıxacağı qeyd olunub. Giqqz bu komandanın Meksika ilə yoldaşlıq görüşündə də iştirak edə bilməyəcək.

Giqqz, 2020-ci ilin noyabrında rəfiqəsinə hücumda şübhəli bilinərək həbs edilib. Lakin o, günahını boynuna almayıb. 46 yaşlı mütəxəssis dindirildikdən sonra araşdırma başa çatanadək girov müqavilində azadlığa buraxılıb.

Xatırladaq ki, Giqqz daha öncə ABŞ, İrlandiya və Finlandiya ilə matçlarda da komandadan kənarlaşdırılmışdı. Həmin görüşlərdə də yığmaya Peyc rəhbərlik etmişdi.

Uels millisi AÇ-2020-yə də vəsiqə qazanıb. Sözügedən komanda yer aldığı A qrupunda İsveçrə və Türkiyə ilə oyunlarını Bakı Olimpiya Stadionunda keçirəcək.