“Real” “qaymaqlılar”ın fransalı mərkəz yarımmüdafiəçisi Eduardo Kamavinqanın zədəsinin xüsusiyyəti ilə bağlı rəsmi bəyanat yayıb.
Arena.az məlumat verir ki, İspaniya klubu bu barədə rəsmi saytında məlumat verib:
“Klubun tibbi xidmətlərinin apardığı müayinələrdən sonra futbolçumuz Eduardo Kamavinqaya sol ayağının budunun ikibaşlı əzələsinin zədəsi diaqnozu qoyulub. Klub vəziyyətin inkişafını gözləyir”, – “qaymaqlılar”ın rəsmi açıqlamasına deyilir.
Xatırladaq ki, Kamavinqa Çempionlar Liqasının Liqa mərhələsinin “Liverpul”la 5-ci tur səfər oyununun (0:2) 56-cı dəqiqəsində zədələnərək əvəzlənib.
Kamavinqanın zədədən bərpası haqda rəsmi məlumat olmasa da, fransalı futbolçunun iki-üç həftəlik sıradan çıxdığı haqda xəbərlər dolaşır.
Eduardo Kamavinqa 2021-ci ilin avqustundan “Real”dadır. “Kral klubu” fransalı mərkəz yarımmüdafiəçisini 31 milyon avro məbləğ müqabilində “Renn”dən transfer edib. Kamavinqanın “Real”la müqaviləsi 2029-cu ilin iyun ayının sonuna qədər qüvvədədir.
Cari mövsümdə Kamavinqa “Real”ın heyətində 9 oyuna çıxıb, 1 məhsuldar ötürmə verib.
Ümumilikdə Kamavinqa “Real”ın heyətində 154 oyuna 2 qol, 9 məhsuldar ötürmə ilə fərqlənib.
Fransalı yarımmüdafiəçi “Real”la İspaniya La Liqasının (2021/2022, 2023/2024), İspaniya Kral Kubokunun (2022/2023), İspaniya Super Kubokunun (2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2023) qalibi olub.
Eduardo Kamavinqa 2020-ci ilin sentyabrında debüt etdiyi Fransa yığmasının heyətində 24 oyuna 2 qol və 1 məhsuldar ötürmə ilə fərqlənib. Eduardo “xoruzlar”la 2021 UEFA Millətlər Liqasını qazanıb.
“Transfermarkt” internet-portalı 22 yaşlı fransalı mərkəz yarımmüdafiəçisi Eduardo Kamavinqanın transfer dəyərini 100 milyon avro məbləğində qiymətləndirir.
