Madrid “Real”ının Fransanın PSJ klubunun hücumçusu Kilian Mbappeni transfer etməsi üçün irəli sürdüyü şərtlər məlum olub.
Arena.az “L’Equipe” dərgisinə istinadən xəbər verir ki, İspaniya nəhəngi transfer təklifi ilə çıxş etməyə hazırdır.
Ancaq bunun üçün “Kral klubu”nun şərtləri var və bu şərtlər kifayət qədər ciddi təsir bağışlayır.
Mənbədən verilmiş məlumata görə, Madrid təmsilçisi heç vaxt Mbappe üçün qapılarını bağlamayıb. Mümkün transfer baş tuta bilər, ancaq fransız hücumçu ona irəli sürülmüş şərtləri də qəbul etməlidir. Bu şərtlərin ən başlıcası, Mbappenin əməkhaqqının azaldılmasına razılıq verməsidir ki, hücumçunun bu xüsusda nə qərara gələcəyi yalnız özünə məlumdur.
İkinci şərt hücumun sol cinahında oynamaqdan imtina etməsidir ki, bu mövqedə də braziliyalı Vinisius Junior ağalıq edir.
Xatırladaq ki, bir qədər əvvəl Mbappenin PSJ ilə müqaviləsini avtomatik surətdə daha bir mövsüm yeniləməyi nəzərdə tutan müvafiq bəndi aktivləşdirmədiyi haqda məlumat təsdiqlənmişdi. Bu isə 2024/2025 mövsümündə Mbappenin azad agent statusuna sahib olması deməkdir. Belə olan halda xeyli müddətdir fransalı hücumçunu transfer etməkdə maraqlı olan “Real”ın şansları arta bilər.
Kilian Mbappe 2018-ci ilin iyul ayında “Monako”dan 180 milyon avro qarşılığında PSJ-yə keçib. O, Paris təmsilçisinin heyətində indiyə qədər keçirdiyi 258 oyunda 211 qol vurmaqla yanaşı, 97 məhsuldar ötürmə müəllifi də olub. Mbappenin “Monako” karyerası isə 60 oyun, 27 qol və 16 asistdən ibarətdir. O, Fransa milli komandasında da 67 oyuna 38 qol vurub.
24 yaşlı Mbappe cari mövsümdə PSJ-nin heyətində bütün turnirlərdə 41 oyun keçirib və 40 qola imza atıb. Bununla yanaşı, Kilian 9 məhsuldar ötürmənin müəllifidir.
