İspaniyanın “Real” klubu futbolçu karyerasını bitirdiyini elan etmiş sabiq oyunçusu, fransalı müdafiəçi Rafael Varana müraciət ünvanlayıb.
Arena.az Madrid klubunun müraciətini təqdim edir:
“Peşəkar futbolçu kimi karyerasını bitirmək qərarına gəlmiş Rafael Varanın açıqlamasından sonra, “Real” klubumuzun əfsanələri siyahısında olan futbolçuya öz təşəkkürünü bildirir.
Rafael Varan “Real” tarixinin ən böyük mərkəz müdafiəçilərindən biri kimi bütün Madrid azarkeşlərinin qəlbində əbədi qalacaq və həmişə klubumuzun dəyərlərini təcəssüm etdirəcək.
“Real” ona və ailəsinə həyatının bu yeni mərhələsində uğurlar arzulayır”.
İngiltərənin “Mançester Yunayted” klubu da fransalı müdafiəçiyə müraciət ünvanlayıb:
“Rafael Varan üçün.
Sən “Old Trafford”da üç mövsüm ərzində rənglərimizi mükəmməl surətdə təmsil etmisən. Təvazökarlığına, aparıcılığına və fədakarlığına görə sənə təşəkkür edirik. Qoy, bu keyfiyyətlər növbəti işində sənə xidmət etsin.
Bir dəfə “qırmızı” olduqdan sonra, əbədi “qırmızı” olaraq qalırsan. Sənin “Mançester Yunayted”in”.
Xatırladaq ki, fransalı mərkəz müdafiəçisi Rafael Varan bu gün futbolçu karyerasına 31 yaşında xitam verdiyini ictimaiyyətə rəsmən açıqlayıb. Varanın son klubu bu ilin yayında azad agent qismində qoşulduğu “Komo” olub. Ulduz müdafiəçi İtaliya klubunda ilk oyununda ciddi zədə alaraq cari mövsümün sonuna qədər sıradan çıxıb.
Rafael Varan futbola “Hellemyes” klubunda qədəm qoyub, buradan “Lans”a yol taparaq böyük futbolda debüt edib. “Lans”da oyunu ilə diqqət çəkmiş fransalı müdafiəçini “Real” 2011-ci ilin iyulunda öz heyətinə qatıb. 2021-ci ilin iyulunda isə “Mançester Yunayted” Varanı “qaymaqlılar”dan satın alıb. Cari ilin iyulunda “Komo”ya keçmiş Varan məlum zədəsindən sonra butslarını asılqandan asmağa qərar verib.
Futbolçu karyerası ərzində Varan klub səviyyəsində yaşıl meydanlarda 480 oyun keçirib, 21 qol və 8 məhsuldar ötürmə ilə fərqlənib.
Rafael Varanın qənimətlər muzeyində “Real”la İspaniya La Liqası (3 dəfə), İspaniya Kral Kuboku, İspaniya Super Kuboku (3 dəfə), Çempionlar Liqası (4 dəfə), UEFA Super Kuboku (3 dəfə), FIFA Klub Dünya Kuboku (4 dəfə) və “Mançester Yunayted”lə İngiltərə Kuboku və İngiltərə Liqa Kuboku var. Fransa yığması ilə Varan DÇ-2018-in və UEFA Millətlər Liqasının (2021) qalibi olub.
