Futbol üzrə Azərbaycan yığmasının hücumçusu Renat Dadaşov Türkiyənin “Ankaragücü” klubunun heyətində məşqlərə start verib.
Arena.az xəbər verir ki, o, komandanın bugünkü hazırlığında iştirak edib.
Oktyabrın 21-də əməliyyat olunmuş 25 yaşlı futbolçu Azərbaycan millisinin UEFA Millətlər Liqası çərçivəsində Estoniya və İsveçə qarşı oyunlarının heyətindən kənarda qalıb.
Qeyd edək ki, Renat Dadaşovun komandası Türkiyə Birinci Liqasının 13-cü turunda Ankara derbisində “Gənclərbirliyi” ilə qarşılaşacaq.
“Ankaragücü” bu mövsüm Birinci Liqada keçirdiyi 9 oyunda 4 qələbə qazanıb, 1 heç-heçə edib, 4 məğlubiyyətə üzülüb. Renatın komandası 13 xalla 10-cu pillədə qərarlaşıb.
Xatırladaq ki, Renat Dadaşov bu mövsümün əvvəlində İsveçrənin “Qrasshopper” klubundan “Ankaragücü” komandasına keçib. O, Ankara təmsilçisinin heyətində 9 oyuna çıxıb, 2 qol vurub, 1 məhsuldar ötürmə müəllifi olub. Millimizin forvardı ötən mövsümdə də icarə əsasında Türkiyənin digər klubu “Hatayspor”un formasını geyinib. Renat karyerası ərzində “Tondela”, “Eştoril”, “Pasuş de Ferreyra”, “Vulverhempton” (U-21), “Ayntraxt” (U-19), “Leypsiq” (U-19, U-17) kimi komandalarda da oynayıb.
Almaniyanın U-16 və U-17 yığmalarında da oynamış Dadaşov, 2017-ci ildə Azərbaycanın U-21 yığmasında 2 oyun keçirib. Elə həmin ilin sentyabrında əsas millimizdə debüt edən hücumçu indiyə qədər yığmamızda 34 oyuna çıxıb, 4 qol vurub, 1 məhsuldar ötürmə verib.
