Renat Dadaşov son anda yada düşdü, komandası qalib gəldi

Futbol üzrə Azərbaycan millisinin hücumçusu Renat Dadaşov Türkiyənin “Hatayspor” komandasında növbəti matçına çıxıb.

Arena.az xəbər verir ki, futbolçumuzun komandası bu gün Türkiyə Super Liqasının 24-cü turu çərçivəsində “Fatih Karagümrük”lə qarşılaşıb.

“Hatayspor” bu rəqiblə doğma meydanda üz-üzə gəlib. Futbolçumuzun komandası meydandan qələbə ilə ayrılıb – 3:1. 41-ci dəqiqədə hesabı açan hataylılar, 51 və 90+5-ci dəqiqələrdə də qonaqları meydanın mərkəzinə dəvət ediblər. Qonaq komanda isə 86-cı dəqiqədə fərqlənib.

Dadaşov bu oyunun 90-cı dəqiqəsində meydana buraxılıb. Cari mövsümdə 4 qol vurmuş hücumçu bu dəfə fərqlənə bilməyib.

Türkiyə yığmasının sabiq qapıçısı Volkan Dəmirəlin çalışdırdığı “Hatayspor” 24 turdan sonra 28 xalla 20 kollektiv arasında 12-ci pillədə qərarlaşıb.

Xatırladaq ki, Renat Dadaşov müqavilə ilə 2022-ci ilin iyul ayından formasını geyindiyi İsveçrənin “Qrasshopper” klubuna məxsusdur. Türkiyə klubu onu bu mövsümün sonuna kimi satınalma şərti ilə icarəyə götürüb. Dadaşov Hatay təmsilçisində 19 oyun keçirib və 4 qol vurub.