“Əl-Nəsr”in portuqal ulduz hücumçusu və kapitanı Kristiano Ronaldo İngiltərə nəhəngi “Mançester Yunayted” haqda fikrini bildirib.
Arena.az “Daily Mail” dərgisinin “Rio Ferdinand presents” podkastına istinadı əsasında portuqal ulduzun müvafiq xüsusda fikrini diqqətinizə çatdırır:
“Artıq əvvəllər dediyim kimi, “Mançester Yunayted”, mənim fikrimcə, yenidən qurulmalıdır. Məşqçi deyir ki, komanda çempionluq və Çempionlar Liqasını qazanmaq uğrunda mübarizə apara bilmir. “Mançester Yunayted”in baş məşqçisi belə söz deyə bilməz. O, düşünə bilər: “Bizim belə imkanımız yoxdur, amma mən bunu dilə gətirə bilmərəm. Biz çalışacağıq. Biz cəhd etməliyik”.
Əgər Ten Haq Ruda (Van Nistelroya) qulaq assa, bu, bəlkə də kömək edər. Düşünürəm ki, bu, çox kömək edə bilər, çünki o, klubu tanıyır, klub isə orada olmuş uşaqları dinləməlidir. Sizi (Rio Ferdinand), Roy Kini, Pol Skoulzu və ya Qari Nevili, hər kəsi, Ser Aleks Ferqyusonu. Bilik olmadan klubu yenidən qura bilməzsiniz. Bu, ofisdə işləyən uşaqların işi deyil”, deyə portuqaliyalı ulduz futbolçu fikrini əsaslandırıb.
Xatırladaq ki, Kristiano Ronaldo 2003-2009-cu və 2021-2022-ci illərdə “Mançester Yunayted”də çıxış edib. Portuqal ulduz “qırmızı şeytanlara” dəfələrlə əsas klub yarışlarından kubokları öz qənimətlər muzeyinə daşıyıb-aparıb, həmçinin çoxsaylı fərdi mükafatlar qazanıb.
Kristiano Ronaldo məhz “qırmızı şeytanlar”ın niderlandlı baş məşqçisi Erik ten Haqla fikir ayrılığı səbəbindən “Mançester Yunayted”i azad agent qismində tərk edərək, 2023-cü ilin yanvarında “Əl-Nəsr”ə keçmişdi.
