“Neftçi”nin qapıçısı Rza Cəfərov Azərbaycan Kubokunun yarımfinal mərhələsi çərçivəsind “Qarabağ”a qarşı keçirdikləri ilk oyunu şərh edib.
Ötən gün “Neftçi Arena”da baş tutan bu oyunda “Qarabağ” 4:0 hesabıyla qalib gəlib.
Qarşılaşmadan sonra Rza Cəfərov Arena.az-ın əməkdaşının suallarını cavablandırıb:
– Matç haqda təəssüratların necədir?
– Açığı, belə hesab gözləmirdim. Yaxşı oyun göstərib, qələbə qazanmaq və yaxud bərabərliklə şansları ikinci oyuna daşımaq istərdik. Təəssüf ki, belə alındı.
– Hesabın belə olması “Qarabağ”ın güclü təzyiqi ilə əlaqədar idi, ya “Neftçi”nin müdafiədəki boşluqları daha çox idi?
– Ola bilər ki, hardasa müəyyən boşluqlar oldu. Onlar da bundan istifadə edib qollar vurdular.
– Belə hesabdan sonra növbəti mərhələyə keçmək şanslarını necə dəyərləndirirsən?
– Bu, futboldur. Açığını deyim, yenə çıxıb vuruşacağıq.
– “Forza Neftçi” azarkeş qrupunun bu gün sizi tək buraxmasını necə şərh edərdin?
– Bu, bizi də məyus edir. Çünki belə oyunda öz stadionumuzda yalnız “Qarabağ” azarkeşlərinin səslərini eşitmək üzücüdür. Bizdə istəyərik ki, “Neftçi” azarkeşləri gəlib bizi dəstəkləsinlər. Tezliklə onların tribunaya dönəcəyini gözləyirəm.
Nahid Ustaclı
