Cari mövsümdə uğursuz çıxışı ilə diqqət mərkəzində olan “Səbail” Azərbaycan çempionatlarının yüksək dəstəsində 200-cü qolunu vurub.
Arena.az xəbər verir ki, yubiley Azərbaycan Premyer Liqasının 19-cu turuna təsadüf edib.
“Sumqayıt”la səfər görüşündə (2:0) hesabı açan Rüfət Abdullazadə komandasının 200-cü qolunun müəllifi olub. Bu rəqəmi 201-ə də çatdıran “dənizçilər” Premyer Liqadakı 223-cü matçında buna nail olublar. Paytaxt təmsilçisi evdə 102, səfərdə 99 qola sevinib. “Səbail” ölkə çempionatları tarixində 200 və daha çox top vuran 23-cü komandadır.
Qeyd edək ki, paytaxt təmsilçisi ilk qolunu 2017-ci il avqustun 13-də “Zirə” ilə səfər oyununda (1:2) vurub. Həmin topun müəllifi Vüqar Nadirov olub.
