“Liverpul”un hücumçusu Məhəmməd Salah Premyer Liqanın 3-cü turunda “Mançester Yunayted”ə qarşı keçirdikləri oyunu şərh edib.
Arena.az xəbər verir ki, misirli ulduz qazandıqları 3:0 hesablı qələbə ilə bağlı bunları söyləyib:
“Bu, böyük qələbədir, amma biz eyni ruhda davam etməliyik. Nəticədən çox razıyıq və qələbə qazanmağa davam etməliyik. Əgər çempionluq uğrunda mübarizə aparmaq istəyirsənsə, hər oyunda qalib gəlməlisən. Bu, vacib oyun idi, ona görə də şadam ki, biz onu qazana bildik”, deyə Salah vurğulayıb.
“Liverpul”un kapitanı və mərkəz müdafiəçisi Vircil van Deyk də “Mançester Yunayted”lə oyununun nəticəsi (3:0) barədə danışıb. Niderlandlı futbolçunun bu barədə fikrini təqdim edirik:
“Bu, qürur məqamıdır. Məni ən çox sevindirən əvvəldən axıra qədər çıxışımız oldu. Biz oyundan həzz almaq istəyirik və buna nail olmağın yeganə yolu çox çalışmaqdır… Diqqəti itirə bilməzdik və bunu bacardıq. Mən oğlanlarla çox fəxr edirəm. Oyun planımız işə yaradı. Səbrimizi qoruyub saxlaya bildik.
Bu mövsüm böyük nailiyyətlər əldə etmək istəyirik. Mən yarışlarda sırf iştirak xatirinə iştirak etmirəm, qalib olmaq istəyirəm”, deyə Van Deyk vurğulayıb.
3 turdan sonra “Mançester Yunayted” İngiltərə Premyer Liqasının yarış cədvəlində 3 xalla 14-cü pillədə qərarlaşıb. “Liverpul” isə 9 xalla 2-ci pillədə, şərti lider qismində yer alıb. 9 xal toplamış “Mançester Siti” “qırmızılar”ı yalnız top fəri ilə üstələyərək 1-ci pillədə qərarlaşıb.
