İtaliyanın “Empoli” klubu heyətini iki yeni futbolçu – hücumçu Sebastyano Espozito və müdafiəçi Mattia Viti ilə gücləndirib.
Arena.az xəbər verir ki, A Seriyası təmsilçisi bu barədə rəsmi saytı vasitəsilə məlumat yayıb.
“Empoli” hər iki oyunçunu qarşıdakı mövsümün sonuna kimi satınalma şərti ilə icarəyə götürüb. Espozito Milan “İnter”indən, Viti isə Fransanın “Nitsa” klubundan icarəyə götürülüb.
Mattia Viti elə “Empoli”nin yetirməsidir. İtaliya klubu 22 yaşlı mərkəz müdafiəçisini 2022-ci ilin avqust ayında 13 milyon avro qarşılığında “Nitsa”ya satmışdı. Amma italyan futbolçu Liqa 1 təmsilçisində möhkəmlənə bilməyib. O, “Nitsa”nın heyətində cəmi 12 oyuna 1 qolla yadda qalıb. Ötən mövsüm isə o, icarə əsasında “Sassuolo”da icarədə olub – 18 oyun və 1 qol.
Mattia Vitinin “Empoli” karyerası isə 27 oyundan ibarətdir. O, İtaliyanın aşağı yaş qrupları üzrə müxtəlif yığmalarında oynamasına rəğmən, əsas millidə debüt şansı qazanmayıb.
Sebastyano Espozito isə “İnter”in yetirməsidir. Milan klubunun əsas komandasında 15 oyuna 1 qol vurmuş italyan hücumçu “Bazel”, “Sampdoriya”, “Anderlext”, “Venetsiya”, “Bari” və SPAL kimi klublarda icarədə də olub. 22 yaşlı forvard İtaliyanın müxtəlif yaş qrupları üzrə yığmalarında oynayıb, əsas millidə isə debüt edə bilməyib.
Yeri gəlmişkən, “İnter” hücumameyilli yarımmüdafiəçisi Qaetano Oristanionu da “Venetsiya”ya satıb. Milan təmsilçisi 21 yaşlı futbolçunun satışından 4 milyon avro qazanıb. İtalyan futbolçu yeni klubu ilə 5 illik müqaviləyə imza atıb.
“İnter”in öz yetirməsi olan Oristanio bu klubun əsas komandasında forma şansı qazanmayıb. Bu üzdən də o, “Volendam” və “Kalyari” kimi klublarda icarədə oynamaq məcburiyyətində qalıb. Universallığı ilə seçilən gənc yarımmüdafiəçi İtaliyanın müxtəlif yaş qrupları üzrə yığmalarında da forma geyinib.
“Empoli” “Milan”ın qapıçısı Devis Vaskesi də icarəyə götürüb. 26 yaşlı kolumbiyalı qolkiper də qarşıdakı mövsümün sonuna kimi satınalma şərti ilə “Empoli”nin heyətinə keçib.
“Milan” Devis Vaskesi 2023-cü ilin yanvarında Paraqvayın “Quarani” klubundan transfer edib. Amma o, bu klubun əsas komandasında forma şansı qazanmayıb. “Milan” kolumbiyalı qapıçısını daha öncə “Şeffild Uensdey” və “Askoli”yə də icarəyə verib.
