İngiltərənin “Vulverhempton” klubu heyətini 3 yeni futbolçu – Andre, Sem Conston və Bastyen Mepiyu ilə gücləndirib.
Arena.az bu barədə Premyer Liqa klubunun rəsmi saytına istinadən xəbər verir.
Tam adı Andre Trindade da Kosta Neto olan braziliyalı dayaq yarımmüdafiəçisi “Fluminense”dən 22 milyon avroya transfer edilib. 23 yaşlı futbolçu ilə müqavilənin müddəti açıqlanmır.
İndiyə qədər yalnız yetirməsi olduğu “Fluminense”də oynamış Andre, bu komandada 197 oyuna 4 qol və 4 assistlə yadda qalıb. O, 2023-cü ilin yayında debüt etdiyi Braziliya yığmasında 5 oyun keçirib.
Qapıçı olan Sem Conston “Kristal Pelas”dan 11,9 milyon avroya transfer olunub. 31 yaşlı ingilis qolkiperlə 4 illik müqavilə imzalanıb. “Kristal Pelas”da 34 oyuna 43 qol buraxmış (11 “quru” matç) Sem, karyerası ərzində “Vest Bromviç”, “Aston Villa”, “Donkaster”, “Preston”, “Skantorp Yunayted”, “Uolsoll”, “Yovil Taun” kimi klublarda da oynayıb, İngiltərə millisində 4 oyun keçirib.
Bastyen Mepiyu isə Fransanın “Nant” klubundan 5 milyon avro müqabilində “Vulverhempton”a gəlib. Əslən Kamerundan olan 18 yaşlı futbolçu İngiltərə klubu ilə 5+1 illik müqaviləyə imza atıb. “Nant”ın yetirməsi olan dayaq yarımmüdafiəçisi əsas komandada 1 oyun keçirib. O, Fransanın aşağı yaş qrupları üzrə yığmalarında da oynayıb.
“Vulverhempton” bu üç oyunçudan başqa “Qarabağ”ın Avropa Liqasının əsas mərhələsindəki rəqiblərindən olan “Ayaks”da çıxış edən Karlos Forbsu da heyətinə qatıb. İngiltərə klubu 20 yaşlı portuqaliyalı futbolçunu bu mövsümün sonuna kimi satınalma şərti ilə icarəyə götürüb. “Mançester Siti”nin futbol akademiyasından da keçmiş Karlos”, “Ayaks”ın əsas komandasında 38 oyuna 3 qol və 5 assistlə yadda qalıb, Portuqaliyanın aşağı yaş qrupları üzrə müxtəlif yığmalarında oynayıb.
“Vulverhempton” 6 oyunçusunu da digər klublara icarəyə verib. Mərkəz müdafiəçisi Naycel Lonveyklə dayaq yarımmüdafiəçisi Co Hoc (hər ikisi 21 yaş) “Haddersfild”ə keçiblər. 19 yaşlı hücumçu Natan Freyzer “Sulte Varegem”ə üz tutubsa, 21 yaşlı vinger Çem Kempbell “Ridinq”ə keçib. Sol cinah müdafiəçisi Huqo Bueno (21) “Feyenoord”la, 20 yaşlı vinger Tavanda Çireva da “Derbi Kaunti” ilə icarə müqaviləsi bağlayıb.
